Мәжіліс депутаты Дәулет Тұрлыханов үлескерлер мәселесін шешуді сұрап, Үкімет басшысының орынбасары Роман Склярға сауал жолдады, деп хабарлайды madeniportal.kz.

Астана қаласының аумағында 243 көппәтерлі тұрғын үй кешенінің құрылысы тоқтап, оған 40 мыңнан астам үлескер тартылған.

Депутаттың сөзінше, 20 жыл өтсе де, мыңдаған қазақстандық жауапсыз құрылыс салушыларға сенім артып, алданған үлескерлердің мәселесі толық шешімін таппай келе жатыр. Салдарынан пәтер де, ақша да жоқ.

Депутаттың айтуына Астананың өзінде "Сатурн-1,2,3,4", "София" сияқты тұрғын-үй кешендері аяқталмаған, немесе аяқталғанының құжаты реттелмеген болып шығады. Сондай-ақ "Диана", "Оникс", "Аскер-1", "Аскер-2", "Хазар", "Оазис" сияқты ондаған жылдар бойы құжаты дұрысталмай, әлі күнге дейін қажетті инфрақұрылымдар жасалмаған тұрғын-үйлер көп екенін айтты.

Айта кетейік заң бойынша, құрылыс салушылар үлескерлердің ақшасын екі жағдайда ғана тарта алады.

Біріншіден, қазақстандық тұрғын үй компаниясымен шарт болған кезде.

Екіншіден, әкімдіктің рұқсаты болған жағдайда. Егер жобаға банк қатысса немесе үйдің каркасы болса, әкімдік рұқсат береді.