Астанада краннан құлап, аяғынан айырылды: үш баланың анасы әділ өтемақы сұрайды

Астанада құрылыс алаңында болған қайғылы оқиға салдарынан мұнаралы кран машинисі бір аяғынан айырылды. Үш баласын жалғыз тәрбиелеп отырған әйел төрт аптадан бері ауруханада жатыр. Оның айтуынша, жұмыс беруші небәрі үш айлық жалақы көлемінде өтемақы ұсынған, деп хабарлады MadeniPortal.kz.

Бұл туралы КТК жазды. Оқиға 31 тамызда елордадағы құрылыс нысандарының бірінде болған. Жұмысшылар мұнаралы кранды бөлшектеп жатқан кезде алып құрылғы құлап кеткен. Салдарынан слесарь оқиға орнында көз жұмып, ал кран машинисі Ақмарал Қарабалиева ес-түссіз күйде ауруханаға жеткізілген.

Дәрігерлер ауыр жарақат алған әйелдің оң аяғын ампутациялауға мәжбүр болған.

Зардап шегушінің айтуынша, қайғылы жағдай кранды бөлшектеу жұмыстары кезінде болған.

Әйел әлі күнге дейін жанын қоярға жер таппай, қатты ауырсынатынын айтады. Оның сөзінше, ауырсынуды басатын дәрілер де көмектеспей жатыр.

Үш баланың анасы енді қалай күн көрмек?

Ақмарал үш баласын жалғыз тәрбиелеп отыр. Жақында ғана бөліп төлеу шартымен пәтер сатып алған. Қазір оның баспана үшін өтейтін қарызы 19 миллион теңгеден асады.

Жұмыс беруші әйелге мүгедектер арбасын сатып берген. Сондай-ақ зардап шегушінің айтуынша, компания оған үш айлық жалақы мөлшерінде өтемақы төлеуге уәде еткен.

Алайда Ақмарал бұл сомамен келіспейді. Еңбекке қабілеттілігін жоғалтқандықтан, ол өзін өмір бойы қаржылай қамтамасыз етуді талап етіп отыр.

Компания өкілдері оқиғаға және туындаған еңбек дауына қатысты түсініктеме беруден бас тартқан.

Кран не себепті құлады?

Қазір құлаған мұнаралы кран оқиға орнында жатыр. Тергеу әрекеттері аяқталғаннан кейін ғана оның қалдықтарын алып тастауға рұқсат беріледі.

Астананың мемлекеттік еңбек инспекциясы департаментінің бөлім басшысы Рустам Жандосовтың айтуынша, апаттың нақты себебін анықтау үшін арнайы ұйым тартылған.

Ақмарал Қарабалиеваны осы аптада ауруханадан шығару жоспарланып отыр.

Алдағы уақытта медициналық-әлеуметтік сараптама оның еңбекке қабілеттілігін қаншалықты жоғалтқанын анықтайды. Соның нәтижесіне қарай әйелге зейнет жасына дейін төленетін ай сайынғы төлем мөлшері белгіленбек.

Әзірге үш баланың анасы қандай көлемде өтемақы алатыны белгісіз. Ал кранның құлауына нақты не себеп болғаны арнайы сараптама қорытындысынан кейін анықталады.