«Балам басын жерге қатты соқты»: Маңғыстауда жаңа вокзалдың эскалаторынан бала мен әжесі құлап кетті

Маңғыстау облысында жаңа теміржол вокзалындағы мүмкіндігі шектеулі жолаушыларға арналған арнайы эскалатордан мүгедектігі бар бала мен оның әжесі құлап кеткен. Бала басынан қатты соққы алған. Оқиғадан кейін анасы полицияға арыз жазды, деп хабарлайды MadeniPortal.kz.

Оқиға 3 қарашада болған. Баланың анасының айтуынша, отбасы әжесін шығарып салу үшін жаңа теміржол вокзалына келген. Ғимаратқа кіреберісте әжесі I топтағы мүгедектігі бар немересін арбамен арнайы көтерілетін жол арқылы алып өтпек болған. Алайда екеуі көтеріле бергенде құлап кеткен.

Оқиғадан кейін баланың анасы вокзал басшылығына жүгінген. Оның сөзінше, жауапты қызметкерлер арнайы жолдың еңістігі 12 пайыз екенін және белгіленген талаптарға сай келетінін айтқан.

Алайда әйел мұндай құрылғының арбадағы адамдар үшін қауіпті екенін алға тартты.

Баланың анасы әлеуметтік желіге бейнежазба жариялаудағы мақсаты вокзал басшылығын қаралау емес, басқа адамдардың осындай жағдайға тап болуына жол бермеу екенін атап өтті.

Оның айтуынша, кейін полиция қызметкерлері хабарласып, оқиға бойынша арыз жазуды сұраған. Әйел бастапқыда бас тартқанымен, ақырында арыз түсірген.

Әзірге вокзал әкімшілігінің оқиғаға қатысты ресми түсініктемесі мен баланың денсаулық жағдайы туралы қосымша ақпарат жарияланбаған.