Инфекция миына дейін жеткен»: Шымкентте төрт айлық сәбидің саусағы кесілді

Шымкентте төрт айлық сәбидің анасы инфекциялық аурухана дәрігерлерін салғырттық танытты деп айыптады. Әйелдің айтуынша, баласына катетер қойылғаннан кейін қабыну басталып, инфекция қанға тараған. Салдарынан дәрігерлер сәбидің аяғындағы бір саусағын кесуге мәжбүр болған, деп хабарлайды MadeniPortal.kz.

Сәбидің анасы Threads әлеуметтік желісінде баласының басынан өткен жағдайды баяндаған. Оның сөзінше, нәрестенің дене қызуы ұзақ уақыт түспегендіктен, медицина қызметкерлері бірнеше рет екпе жасаған. Кейін катетер қойылған жер көгеріп, іріңдей бастаған.

Әйел инфекцияның бүкіл ағзаға тарап, миға дейін жеткенін алға тартады. Ол дәрігерлер баласының жағдайы нашарлаған кезде дер кезінде шара қолданбады деп есептейді.

Қазір төрт айлық сәби Алматыдағы аурухананың жансақтау бөлімінде жатыр.

Оқиға әлеуметтік желіде қызу талқыланып жатыр. Кейбір қолданушылар өз балаларының да катетер қойылғаннан кейін инфекциялық асқынуларға тап болғанын айтып, пікір қалдырған.

Ал Шымкент қалалық денсаулық сақтау басқармасы аталған жағдайға қатысты тексеру жүргізіліп жатқанын хабарлады. Ведомство тексеру аяқталғаннан кейін қосымша түсініктеме беретінін мәлімдеді.

Әзірге сәбидің жағдайының нашарлауына медицина қызметкерлерінің әрекеті себеп болғаны ресми түрде расталған жоқ.