Әсел Жанасова премьер-министрдің орынбасары – көлік министрі болып тағайындалды

Мемлекет басшысы Қасым-Жомарт Тоқаевтың Жарлығымен Әсел Жұбанышқызы Жанасова Қазақстан Республикасы премьер-министрінің орынбасары – көлік министрі болып тағайындалды. Ол бұған дейін атқарған Президент Әкімшілігі басшысының орынбасары қызметінен босатылды, деп хабарлайды MadeniPortal.kz.

Әсел Жанасова Президент Әкімшілігі басшысының орынбасары лауазымын 2025 жылғы 10 желтоқсаннан бері атқарып келген. Оған дейін Мемлекет басшысының кеңесшісі болған.

Жаңа тағайындау Көлік министрлігіндегі басшылық ауысуымен қатар жарияланды. Бүгін, 3 қарашада, Президент Жарлығымен Нұрлан Сауранбаев көлік министрі қызметінен босатылды.

Әсел Жанасова 1987 жылы Алматы қаласында дүниеге келген. 2010 жылы «Болашақ» бағдарламасымен Кембридж университетінде компьютерлік ғылымдар саласында білім алған. 2014 жылы осы университеттің магистратурасын тәмамдаған. Сондай-ақ Мәскеу мемлекеттік университетінде Executive Management бағдарламасы бойынша оқыған.

Еңбек жолын Лондондағы халықаралық компанияда ақпараттық технологиялар саласында бастаған. Кейін Ұлттық банкте басшылық қызмет атқарып, «Зерде» холдингін басқарған. «Астана» халықаралық қаржы орталығында кеңесші және цифрлық технологиялар жөніндегі басқарушы директор болған. 2020–2022 жылдары сауда және интеграция вице-министрі, 2022–2025 жылдары «Қазпошта» басқармасының төрағасы қызметін атқарған.