«Пышақ сұққан»: Қарағандыда төбелестен 17 жастағы студент көз жұмды

Қарағандыда төбелес кезінде көз жұмған студенттің ісі бойынша сот аяқталды, деп хабарлайды Madeniportal.kz. 

Қылмыстық істі Қазыбек би аудандық соты қарады. Сот 21 жастағы қарағандылыққа үкім шығарды. Ол абайсызда адам өлтіргені үшін айыпталды.

Алайда сотта қаза тапқан Диас Кейкеновтің туыстары қылмыстық істі қайта қарауды талап етті. Олар айыпталушы әдейі адам өлтірді деп есептейді. Олардың айтуынша, 21 жастағы жігіт мас күйде болған. Және достарының марқұмның достарымен қақтығысын көріп, қолына пышақ ала жүгірген.

Сотталушының қорғаушылары мен туыстары жәбірленуші тараптың сөздерін жоққа шығарды. Олар айыпталушының өзін-өзі қорғау мақсатында әрекет еткенін айтады. Айыпталушының адвокаты марқұмның өліміне уақытында медициналық көмек көрсетпеген дәрігерлер де кінәлі болуы мүмкін деп есептейді.

«Менің ұлым қылмыскер емес. Егер бұл жағдай болмағанда, ол биыл диплом алар еді. Ұлым мектепте жақсы оқыды. Мен ұлынан айырылған отбасының қайғысын түсінемін. Олардан шын жүректен кешірім сұраймын, тағы да көңіл айтамын», - деді сотталушының анасы.

Сот істі қарап, шешім шығарды. Сотталушыға 9 жыл бас бостандығынан айыру жазасы тағайындалды. Сондай-ақ сот сотталушыдан моральдық және материалдық залал үшін өтемақы ретінде 13 миллион теңгеден астам қаражат өндіріп алды.

Марқұмның туыстары сот үкімімен келіспейді және бұл шешімге шағымдануға ниетті.

«Прокурор 11 жылға бас бостандығынан айыруды сұрады. Ал сот тек 9 жыл тағайындады. Тергеу бір жылдан аса уақыт жүргізілді. 7 жылдан кейін бұл бостандыққа шығады. Ал біздің ұлымыз ешқашан қайтпайды. Біз үкімге шағымданамыз», - деді қаза тапқан студенттің әкесі Қарғаш Кейкенов.

Қайғылы оқиға 2024 жылдың наурыз айында болған. Екі топ жігіттер қақтығысып, 17 жастағы Диас Кейкенов 2 рет пышақ жарақатын алады. Нәтижесінде жасөспірім ауруханада көз жұмды. Ол Қарағанды университетінің бірінші курсында дене шынықтыру пәнінің мұғалімі мамандығында оқыған.