Қазақстанда TikTok 1,37 миллион видеоны өшірді: қандай контентке тыйым салынған?

Қазақстанда TikTok әлеуметтік желісі үш айдың ішінде 1,37 миллионнан астам видеоны өшірген. Олардың барлығы платформа ережелерін бұзғаны үшін жойылған. Бұл туралы TikTok компаниясының ресми есебінде айтылған, деп хабарлайды MadeniPortal.kz.

Компания 2026 жылдың екінші тоқсаны, яғни сәуір мен маусым аралығындағы контентті бақылау нәтижелерін жариялады.

Есепке сәйкес, Қазақстанда осы кезеңде 1,37 миллионнан астам бейнеролик жойылған. Бұл орта есеппен тәулігіне 15 мыңға жуық, ал сағатына шамамен 630 видео өшірілгенін білдіреді.

Видеолар не үшін өшірілген?

TikTok мәліметінше, жойылған бейнероликтердің 99,6 пайызы пайдаланушылар шағым түсірмей тұрып анықталған.

Ал ереже бұзған видеолардың 92,1 пайызы жарияланғаннан кейінгі алғашқы 24 сағат ішінде өшірілген.

Платформаның Қауымдастық ережелері қауіпті әрекеттерді насихаттауға, қорқытуға, қорлауға, қудалауға және басқа да тыйым салынған материалдарды жариялауға шектеу қояды.

Контентті тексеру барысында жасанды интеллект пен автоматтандырылған жүйелер кеңінен қолданылады.

Әлем бойынша 188 миллионнан астам видео жойылған

Компанияның мәліметінше, 2026 жылдың сәуір-маусым айларында TikTok бүкіл әлем бойынша ережені бұзған 188 миллионнан астам бейнероликті өшірген.

Олардың 99,5 пайызы пайдаланушылар шағымданғанға дейін анықталған. Ал 92,7 пайызы алғашқы тәулікте жойылған.

Әлем бойынша өшірілген видеолардың 97,4 пайызы автоматтандырылған жүйелердің көмегімен анықталып, жойылған. Бұл көрсеткіш платформаның осы уақытқа дейінгі ең жоғары нәтижесі ретінде тіркелген.

Сонымен қатар күрделі және даулы жағдайларды TikTok қауіпсіздік қызметінің мамандары жеке қарайды.

Миллиардтаған жалған лайк пен жазылушы анықталған

TikTok жалған аккаунттар мен жасанды танымалдыққа қарсы күрестің нәтижелерін де жариялады.

Екінші тоқсанда әлем бойынша 352 миллионнан астам жалған аккаунттың ашылуына жол берілмеген.

Бұдан бөлек, платформа 6,2 миллиардтан астам қолдан көбейтілген лайкты, 2,7 миллиард жалған жазылушыны және жалған аккаунттар арқылы қалдырылған 190 миллион пікірді жойған.

Сондай-ақ жазылушылар санын жасанды түрде көбейтуге бағытталған 7,5 миллиардтан астам әрекеттің алдын алған.

Компания өкілдерінің айтуынша, мұндай шаралар әлеуметтік желідегі қауіпсіздікті арттыруға, жалған белсенділікті азайтуға және пайдаланушыларды зиянды контенттен қорғауға бағытталған.