Алматыда күн күрт суытып, қар жауады

Сейсенбіде, 10 қарашада, Алматыда күн салыстырмалы түрде жылы болады, күндіз ауа температурасы +18…+20 градусқа дейін көтеріледі. Алайда күннің екінші жартысында жаңбыр жауып, тұман түсуі ықтимал. Оңтүстік-батыстан соғатын желдің екпіні күндіз секундына 18 метрге дейін жетуі мүмкін.

11 қарашада ауа райы айтарлықтай өзгереді. Қалада күн бұлтты болып, жауын-шашын, кей уақыттарда қатты жаңбыр, қар жауады. Жел бағыты солтүстік-батыстан солтүстік-шығысқа ауысып, оның екпіні секундына 15-20 метрге дейін жетуі мүмкін.

Ауа температурасы түнде де, күндіз де +5…+7 градус болады, ал күннің екінші жартысында одан ары төмендейді.

Бейсенбіде, 12 қарашада түнде де жаңбыр мен қар жауып, кей жерлерде тұман түсуі мүмкін. Күндіз ауа температурасы +5…+7 градус болады. 

Астанада қар, көктайғақ, тұман болжанып отыр

Елордада 10 қарашада түнде аздап қар жауады. Сондай-ақ, синоптиктер тұман мен көктайғақ болатынын ескертті. Түнде ауа температурасы -1…-3 градус, күндіз -1-ден +1 градусқа дейін болады.

11 қарашада Астанада жауын-шашын жаумайды, бірақ түнде, таңертең тұман түсуі мүмкін. Ауа температурасы түнде -3…-5 градусқа дейін төмендеп, күндіз 0…+2 градус болады.

Бейсенбіде, 12 қарашада елордада күн құбылмалы болады, жауын-шашын жаумайды. Түнде, таңертең қайта тұман түседі. Ауа температурасы түнде -2…-4 градус, күндіз 0…+2 градус деңгейінде сақталады.