Үкімет медицина саласына қатысты жаңа қаулы қабылдады

Қазақстанда Денсаулық сақтау министрлігінің міндеттері мен өкілеттіктері кеңейтіледі. Үкіметтің 2026 жылғы 4 қарашадағы қаулысына сәйкес, ведомство дәрі-дәрмек айналымын, медициналық қызмет сапасын, дәрігерлерді даярлау мен медициналық сақтандыруға қатысты бірқатар бағытты реттейтін болады, деп хабарлайды MadeniPortal.kz.

Жаңа өзгерістердің басым бөлігі 2027 жылғы 1 қаңтардан бастап күшіне енеді.

Дәрі-дәрмек айналымына бақылау күшейеді

Жаңартылған ережеге сәйкес, Денсаулық сақтау министрлігі дәрілік заттар мен медициналық бұйымдардың айналымын мемлекеттік бақылау және қадағалау саласындағы өкілеттіктерін жүзеге асырады.

Сонымен қатар ведомство денсаулық сақтау саласындағы есірткі, психотроптық заттар мен прекурсорлардың айналымын қадағалайды.

Министрлік дәрілік препараттардың бағасын реттеу, тегін немесе жеңілдікпен берілетін дәрілер тізімін бекіту, сондай-ақ дәрілік заттарды тіркеу және сараптамадан өткізу тәртібін айқындау бағытындағы жұмысын жалғастырады.

Медицина қызметкерлерін даярлау тәртібі өзгереді

Құжатта медициналық білім беру саласына қатысты да бірқатар жаңа өкілеттік қарастырылған.

Атап айтқанда, министрлік:

• Медицина мамандарына деген қажеттілікті және оқуға қабылдау көлемін айқындайды;

• Интернатура мен резидентура бағдарламалары бойынша медициналық мамандықтар тізімін бекітеді;

• Медициналық және фармацевтикалық кадрларды даярлауды ұйымдастыру және қаржыландыру қағидаларын белгілейді;

• Мемлекеттік білім беру тапсырысы бойынша оқыған мамандарды жұмысқа жіберу тәртібін айқындайды;

• Медициналық оқу орындарындағы симуляциялық кабинеттер мен орталықтарды жабдықтаудың ең төменгі нормативтерін бекітеді.

Сондай-ақ жоғары және жоғары оқу орнынан кейінгі медициналық білім беру бағдарламаларын сараптау мен тіркеу мәселелері де министрліктің құзыретіне енгізіледі.

Дәрігерлерді сақтандыру мәселесі де қамтылған

Жаңа ережелерде медицина қызметкерлерінің кәсіби жауапкершілігін, сондай-ақ қызметтік міндеттерін орындау кезіндегі өмірі мен денсаулығын сақтандыруға қатысты өкілеттіктер нақтыланған.

Денсаулық сақтау министрлігі қаржы нарығын реттейтін уәкілетті органмен келісе отырып, тиісті сақтандыру қағидалары мен үлгілік шарттарды бекітеді.

Медициналық қызмет сапасына назар аударылады

Министрліктің міндеттеріне медициналық қызмет көрсету сапасын бақылау және қадағалау, санитариялық-эпидемиологиялық қауіпсіздікті қамтамасыз ету, сондай-ақ денсаулық сақтау ұйымдарында ішкі инфекциялық аудит жүргізу қағидаларын бекіту кіреді.

Бұдан бөлек, ведомство белгілі бір аурулардан кейін қозғалыс мүмкіндігі уақытша шектелген балаларға арнайы көмекші құралдар беру тәртібін реттейді.

Құжатта мемлекеттік қызметшілердің есірткі немесе психотроптық заттарды қолдану белгілерін анықтау рәсімдеріне қатысты да жаңа өкілеттіктер көзделген.

Өзгерістер қашан күшіне енеді?

Үкімет қаулысы, жекелеген тармақтарын қоспағанда, 2027 жылғы 1 қаңтардан бастап қолданысқа енгізіледі.

Айта кетейік, өзгерістер негізінен Денсаулық сақтау министрлігінің өкілеттіктері мен мемлекеттік реттеу тәртібіне қатысты. Құжатта азаматтарға жаңа медициналық төлем енгізу немесе дәрі-дәрмек бағасын жаппай көтеру туралы шешім қарастырылмаған.