Қырғызстан президенттігіне 11 адам таласуға ниетті: тізімде Садыр Жапаров та бар

Қырғызстанда президенттікке кандидаттарды ұсыну мерзімі аяқталды. Алдын ала мәлімет бойынша, 2027 жылғы президент сайлауына қатысуға 11 адам өтініш білдірген. Олардың қатарында қазіргі мемлекет басшысы Садыр Жапаров та бар, деп хабарлайды MadeniPortal.kz. 

Қырғызстанның Орталық сайлау комиссиясының мәліметінше, кандидаттарды ұсыну кезеңі 13 қарашада аяқталған. Президенттікке үміткерлер арасында кәсіпкерлер, бұрынғы мемлекеттік қызметкерлер, депутаттар мен саясаткерлер бар. Олардың біреуі – әйел.

Президенттікке үміткерлер тізімі:

1. Аймен Касенов – кәсіпкер;

2. Азамат Эсенбеков – экономист, бұрынғы аудан әкімі;

3. Сыймык Жапыкеев – Қаржы полициясының бұрынғы басшысы;

4. Акай Қыдыров – кәсіпкер;

5. Исхак Масалиев – Жогорку Кенештің бұрынғы депутаты;

6. Садыр Жапаров – Қырғызстанның қазіргі президенті;

7. Бактыбек Калмаматов – Жогорку Кенештің бұрынғы депутаты;

8. Бакытбек Адылов – Мемлекеттік көші-қон қызметінің бұрынғы басшысы;

9. Амур Айба Медер – кәсіпкер;

10. Мамбетжунус Абылов – Орталық сайлау комиссиясының бұрынғы төрағасы;

11. Клара Сооронкулова – Конституциялық палатаның бұрынғы судьясы.

Үміткерлердің жасы 34 пен 72 аралығында. Ең үлкен кандидат – 72 жастағы Мамбетжунус Абылов. Ал ең жасы Акай Қыдыров 16 қарашада 35 жасқа толады.

Қырғызстан заңнамасына сәйкес, президенттікке кандидат ретінде тіркелу үшін кемінде 30 мың сайлаушының қолын жинау қажет. Қол жинау науқаны 7 желтоқсанға дейін жалғасады.

Кандидаттарды тіркеуге қажетті құжаттар 13 желтоқсанға дейін қабылданады. Ал үміткерлерді ресми тіркеу 23 желтоқсанда аяқталады.

Қырғызстандағы президент сайлауы 2027 жылғы 27 қаңтарға белгіленген.