«70 жас өмірді өзгертуге кедергі емес»: Өскемендік ерлі-зайыптылар Америкада жаңа өмір бастады

Өскемендік ерлі-зайыпты Гүлзия мен Ерғали 70 жасында өмірлерін түбегейлі өзгертіп, Америка Құрама Штаттарына қоныс аударған. Бүгінде олар Нью-Йоркте тұрып, ағылшын тілін үйреніп, саяхаттап жүр, деп хабарлады Bairaqmedia.kz.

Гүлзия мен Ерғали өмірінің басым бөлігін Қазақстанда өткізген. Екеуі де ұзақ жыл ветеринар болып еңбек еткен. Зейнет жасына жеткенде тыныш өмір сүрудің орнына, олар басқа елге көшіп, жаңа ортаға бейімделуді таңдаған.

Ерлі-зайыптылардың ұлы Жасұлан АҚШ-та көп жылдан бері тұрады. Ол ата-анасының Америкаға көшуі мәжбүрлі шешім болғанын қаламаған. Өйткені егде жаста үйреншікті ортаны тастап, бөтен елде өмір бастау оңай емес екенін түсінген.

Жаңа өмірдің алғашқы кезеңі ерлі-зайыптылар үшін қиындықсыз өтпеген. Тіл білмеу, күнделікті тұрмыстағы өзгешеліктер мен жаңа ортаға үйрену біраз уақытты талап еткен. Тіпті дүкенге барудың өзі алғашында қиындық туғызған.

Соған қарамастан, олар жасына қарамай ағылшын тілін үйренуге кіріскен. Бүгінде ерлі-зайыптылар сабаққа қатысып, жаңа адамдармен танысып, бос уақыттарын тиімді өткізуге тырысады.

Гүлзия мен Ерғали мұражайларға, концерттерге барып, Американың түрлі қалаларын аралап жүр. Сонымен қатар туған елмен байланысын үзбеген. Қазақстанды сағынған кезде елге келіп тұруға мүмкіндік бар.

Олардың оқиғасы зейнетке шығу өмірдің жаңа кезеңін бастауға кедергі емес екенін көрсетеді. Ал ұлы Жасұланның ұстанымы — ата-анасының орнына шешім қабылдамай, олардың өз таңдауын құрметтеу.