«Қыз Жібек» фильміндегі камзолға қатысты даудан кейін Мәдениет министрлігі кино реквизиттерін цифрландырады

Мәдениет министрлігінде «Қыз Жібек» фильміндегі аңызға айналған камзолға қатысты жағдайға түсініктеме беріліп, оны цифрландыру жоспарлары туралы айтылды, деп хабарлады MadeniPortal.kz.

Мәдениет және ақпарат вице-министрі Евгений Кочетов Үкімет кулуарында ведомство кино реквизиттері қорымен жұмыс істеп жатқанын және оны жүйелеуді жоспарлап отырғанын мәлімдеді.

«Қазақстандық кинода қолданылған барлық реквизит көрмеге қойылады», — деді ол.

Сонымен қатар журналистер қоғамда камзолға қатысты дау туындағанға дейін министрлік құнды жәдігерлердің сақталуына жеткілікті көңіл бөлмеді деген күмән білдірді. Бұған жауап ретінде Кочетов бұл пікірлерді жоққа шығарып, аталған бұйымның «Қазақфильм» құрылымында сақталғанын атап өтті.

«Бұл онша дұрыс емес пікір. Мүлде олай емес. Ол “Қазақфильм” музейінде жалпы реквизиттердің арасында сақталды. Бізде жәдігерлерді сақтау бойынша белгілі бір талаптар бар, сондықтан Мәдениет министрлігі бұған мән бермеді деп айта алмаймын. Министрлік осы жылдар бойы қазақстандық киноның көптеген реквизиттерін сақтаумен айналысып келеді. Бұрын “Қазақфильм” музейі осындай форматта жұмыс істеген. Енді біз экспонаттарды қайта қарап, цифрландыратын боламыз», — деді вице-министр.