«Салдары тым қымбатқа түседі»: Тоқаев қоғамдағы қауіпті мәселеге назар аударды

Мемлекет басшысы Қасым-Жомарт Тоқаев қоғам қауіпсіздігін қамтамасыз етуде әр азаматтың жеке жауапкершілігі маңызды екенін атап өтті. Президенттің айтуынша, көптеген апаттың алдын алуға болады, алайда адамдардың немқұрайдылығы мен салғырттығы ауыр зардаптарға әкеліп жатады, деп хабарлайды MadeniPortal.kz Ақордаға сілтеме жасап.

Президент Қазақстан мемлекеті өз азаматтарына қай жерде болса да көмек қолын созатынын еске салды. Оның айтуынша, бұл қағидат Конституцияда нақты бекітілген. Ата заңда адам өмірі мен қауіпсіздігі, азаматтардың құқықтарын қорғау ең жоғары құндылықтар ретінде қарастырылады.

Қасым-Жомарт Тоқаев қауіпсіздік ең алдымен әр адамның жеке жауапкершілігінен басталатынын айтып, қоғамдағы бейқамдық пен салғырттық мәселесіне ерекше тоқталды.

Мемлекет басшысы жауапкершілік, тәртіп пен ұқыптылық қауіпсіз әрі өркениетті қоғам қалыптастырудың басты негізі екенін жеткізді. Сондай-ақ өскелең ұрпаққа заңды құрметтеу, тәртіпке бағыну және табиғатты аялау құндылықтарын сіңіру қажеттігін айтты.

Президент қиын жағдайда қалған адамдарға қол ұшын созу қазақ халқының бойына сіңген асыл қасиеттердің бірі екенін атап өтті.

Сонымен қатар Мемлекет басшысы құтқарушылардың қажырлы еңбегіне жоғары баға беріп, олардың халық қауіпсіздігі жолындағы қызметін ерекше атап өтті.

Мемлекет басшысы азаматтардың қауіпсіздігіне жауапты мамандардың адал еңбегі мен қоғамдағы өзара жанашырлық елдің тұрақты дамуы үшін маңызды екенін жеткізді.