Ұлытауда ағылшынша еркін сөйлеген полицей желіні жарды

Ұлытаулық полицей ағылшын тіліндегі білімімен жұртты таңдандырды, деп хабарлады MADENIPORTAL.KZ.

Ұлытау облысында ағылшын тілінде еркін сөйлейтін полиция инспекторының әрекеті әлеуметтік желі қолданушыларының жылы ықыласына ие болды. Полиция капитаны шетелдік туристерге ағылшын тілінде туған өлкенің табиғатын таныстырып, көпшіліктің құрметіне бөленген.

Желіде жарияланған видеодан полицейдің шетел азаматтарына Ұлытаудың көрікті жерлерін таныстырып, ағылшын тілінде еркін тілдесіп жатқанын көруге болады.

Ұлытау облыстық полиция департаментінің мәліметінше, видеодағы азамат – Ұлытау ауданындағы учаскелік полиция инспекторы, капитан Дулат Әбдікәрімов.

Бұдан бөлек, пікір білдірушілердің бірі капитан Әбдікәрімовтың бұрын шет тілінен сабақ бергенін де атап өткен: "Бұл азамат Сәтпаев қаласындағы №27 қазақ орта мектебінде ағылшын тілінен мұғалім болған. Қазір оның шәкірттері аудармашы болып еңбек етіп жүр", – делінген пікірде.