«Заң алдында бәрі тең»: Мәдениет және ақпарат министрі БАҚ өкілдері мен блогерлерге үндеу жасады

Қазақстанның мәдениет және ақпарат министрі Аида Балаева сайлау науқаны кезеңінде журналистер, блогерлер мен белсенділердің қызметіне қатысты бірқатар маңызды мәселеге түсініктеме берді, деп хабарлады MadeniPortal.kz.

Ол журналистер мен блогерлердің, соның ішінде фото және бейнетүсірілім жүргізуге қатысты құқықтарының заңмен қорғалатынын атап өтті. «Масс-медиа туралы» заңға сәйкес, журналистер кәсіби қызметі аясында фото, аудио және бейнежазба жасап, ақпарат тарата алады.

Балаеваның айтуынша, бейнеленген адамның келісімінсіз журналистер мен блогерлер түсірілімді бірнеше жағдайда жүргізе алады. Атап айтқанда, адам мәдени, спорттық, әлеуметтік маңызы бар, бейбіт және өзге де жария іс-шараларға қатысқан кезде; таралған ақпарат оның қызметтік немесе қоғамдық қызметіне қатысты болған жағдайда немесе адамның өзі суретін ашық қолжетімділікке жариялаған кезде; сондай-ақ түсірілім қоғамдық тәртіпті қорғау мақсатында жүргізілген кезде рұқсат етіледі.

Министр әлеуметтік желілерде БАҚ өкілдерінің, белсенділер мен блогерлердің аккаунттары жаппай бұғатталып жатыр деген ақпаратқа да тоқталды. Оның сөзінше, Мәдениет және ақпарат министрлігі әлеуметтік желі қолданушыларының, соның ішінде БАҚ пен журналистердің аккаунттарын бұғаттамайды. Мемлекет сөз және пікір білдіру еркіндігін шектеуге мүдделі емес.

Министр сонымен қатар сөз бостандығы ақпарат таратқаны үшін жауапкершілікпен қатар жүруі керек екенін атап өтті. Оның айтуынша, әр азамат өз құқықтарымен бірге қоғам мен мемлекет алдындағы міндеттерін де түсінуі қажет. Әлеуметтік мәртебе, қызмет, танымалдық немесе жазылушылар саны ешкімді заң талаптарынан босатпайды.

Балаева журналистер мен блогерлерге ақпарат таратпас бұрын оның шынайылығын міндетті түрде тексеруге шақырды. Сондай-ақ әлеуметтік желілер мен онлайн-платформалардың әкімшіліктеріне заңға қайшы контентті дер кезінде анықтап, жою жұмыстарын күшейту қажеттігін айтты.

Сонымен бірге министр заңсыз контент пен заңды пікір білдіруді, кәсіби журналистік қызмет пен қоғамдық пікірталасты нақты ажырату маңызды екенін атап өтті. Оның пікірінше, құқыққа қайшы контентпен күрес сөз бостандығын негізсіз шектеуге себеп болмауы тиіс.

Министр БАҚ өкілдері мен блогерлерді ақпарат тарату кезінде жауапкершілік танытып, дереккөздерді тексеруге және масс-медиа, онлайн-платформалар мен сайлау туралы заң талаптарын бұзбауға шақырды.