Зейнеткерлердің қарызы кешірілуі мүмкін

Қазақстанда зейнеткерлердің қарызын кешіру ұсынылып отыр, деп хабарлады Мadeniportal.kz.

Мәжіліс депутаты Қайрат Балабиев осындай ұсыныс жасады. Оның айтуынша, қарызға батқан азаматтарға көмектесу үшін банктерге берешегін кешіру, соттан тыс және сот арқылы «банкрот» деп тану, сондай-ақ төлем қабілетін арттыру үшін қабылданған заң өз мақсатына сай жұмыс істемей жатыр. Бұл заң борышкерлерге ешкімге жүгінбей-ақ, өтініш беруге ыңғайлы жағдай туғызуы керек еді.

Депутаттың айтуынша, қарызы 6 миллион 291 мың теңгеден аспайтын азаматтар банкроттыққа өтініш беру мүмкіндігіне ие болуы керек, бірақ қазіргі жағдайда бұл мүмкіндіктер іс жүзінде жүзеге аспайды. Е-өтініш қосымшасы арқылы жолданған өтініштердің қанағаттандырылмауының салдарынан көптеген зейнеткерлер зейнетақыларынан айрылып жатыр. Олардың көбі банктерге қарыздар, ал сот орындаушыларының әрекеті олардың есепшоттарын бұғаттап, шетелге шығу мүмкіндіктерін шектеп қойған.

Депутат өз сөзінде: «Зейнетақы әлеуметтік қорғалған есепшот санатына жатқызылмағандықтан, зейнеткерлердің зейнетақысы қарыздарды төлеуге кетіп жатыр. Банктерге барсаңыз, 32 мың теңге зейнетақысы бар, бірақ ол да жоқ болып кеткен, зар илеген зейнеткерлерді көресіз», — деді.