«17 қарашада интернет үш айға өшеді»: ТЖМ шұғыл түсініктеме берді

Әлеуметтік желілерде 17 қарашадан бастап бүкіл әлемде интернет үш айға өшіп, банк жүйелері істен шығады деген ақпарат тарады. Желі қолданушыларын ақшасын банктен шешіп алып, азық-түлік пен су жинауға шақырған. Алайда Қазақстанның Төтенше жағдайлар министрлігі мұндай қауіп туралы ешқандай ресми ескерту жасалмағанын мәлімдеді, деп хабарлайды  MadeniPortal.kz. 

Желіде тараған жазбаларда 17 қарашада ауқымды хакерлік шабуыл жасалып, банктердегі шоттар бұғатталуы және адамдардың ақшасы жоғалуы мүмкін екені айтылған. Тіпті интернет байланысы үш айға толық тоқтайды деген болжамдар да жарияланған.

Алайда Төтенше жағдайлар министрлігі бұл ақпаратты растамады.

Ал Кибершабуылдарды талдау және тергеу орталығының мамандары интернеттің бір мезетте бүкіл әлем бойынша өшіп қалуы өте күрделі әрі ықтималдығы төмен жағдай екенін айтты. Өйткені интернет, байланыс және банк жүйелері бір орталықтан басқарылмайды.

Сонымен қатар ТЖМ азаматтарға үйде кемінде 72 сағатқа жететін ауыз су, азық-түлік, дәрі-дәрмек және басқа да қажетті заттар қорын сақтауға кеңес беретінін түсіндірді. Алайда бұл – жер сілкінісі немесе су тасқыны сияқты төтенше жағдайларға дайындықтың қалыпты шарасы. Оның 17 қарашаға қатысты қауесетке ешқандай байланысы жоқ.

Мамандар азаматтарды тексерілмеген ақпаратқа сенбеуге, әсіресе әлеуметтік желілердегі үрей туғызатын хабарламаларды таратпауға шақырды. Ресми ескертулерді ТЖМ мен өзге де жауапты мемлекеттік органдардың ақпараттық арналары арқылы тексеру ұсынылады.