TikTok-қа оңбай айыппұл салынды: компания 400 млн доллар төлейді

TikTok пен оның иесі ByteDance АҚШ-та балалардың жеке деректерін қорғау талаптарын бұзды деген айып бойынша 400 миллион доллар төлеуге келісті, деп хабарлайды БАҚ. Бұл балалардың интернеттегі құпиялылығын қорғау туралы заңға (COPPA) қатысты істер бойынша ең ірі келісімдердің бірі саналады, деп хабарлады MadeniPortal.kz.

АҚШ Әділет министрлігінің мәліметінше, компания алдымен 300 миллион доллар төлейді. Қалған 100 миллион доллар TikTok-тың алдындағы Musical.ly платформасына қатысты 2019 жылғы келісімнің күші жойылғаннан кейін төленбек. 

АҚШ Әділет министрлігі мен Федералдық сауда комиссиясы TikTok пен ByteDance-ке қарсы талап-арызды 2024 жылы берген. Компаниялар 13 жасқа толмаған балаларға ата-анасының келісімінсіз аккаунт ашуға мүмкіндік беріп, олардың жеке мәліметтерін заңсыз жинады деп айыпталған. 

Сондай-ақ талап-арызда TikTok ата-аналардың балаларының аккаунттары мен жеке мәліметтерін жою туралы өтініштерін тиісті деңгейде орындамағаны айтылған. 

TikTok бұған дейін тағылған айыптардың бір бөлігі ескі тәжірибелерге қатысты екенін және олардың кейбірі қазірдің өзінде түзетілгенін мәлімдеген. АҚШ Әділет министрлігі де сот процесі басталғаннан бері компанияның жас қолданушыларды қорғау, жас ерекшелігін анықтау және ата-ана бақылауын күшейту бағытында бірқатар өзгеріс енгізгенін атап өтті.