Камералық музыка кештері: жас дарындардың жаңа тынысы

"Астана Опера" театрының Камералық залында дәстүрлі «Музыкалық демалыс» жобасы қайта оралады. 25 шілде мен 8 тамыз аралығында өтетін маусымаралық концерттер елордалық көрермендерге шетелде білім алып жүрген талантты қазақстандық жас музыканттардың өнерін тамашалауға мүмкіндік береді, деп хабарлайды MadeniPortal.kz

Жобаға Пезаро қаласындағы Россини атындағы консерватория (Италия), Кельн музыка және би жоғары мектебі (Германия), Шотландия Корольдік консерваториясы (Ұлыбритания), Карнеги – Меллон университеті (АҚШ) және П.Чайковский атындағы Мәскеу консерваториясы сияқты әлемнің жетекші оқу орындарында оқитын студенттер қатысады.

Театр басшылығы бұл бастама арқылы болашағынан зор үміт күттіретін жас өнерпаздарға қолдау көрсетіп, олардың кәсіби сахнада өнер көрсетуіне жағдай жасауда.

25 шілде күні сахнаға вокалистер Нұрай Шалман мен Айдос Арниязов, скрипкашылар Дариға Қазкенова мен Жанель Бекенова, альтшы Әділ Кәрімов, виолончельшілер Сейіт Жаныбеков пен Илхам Айымбетов, флейташы Камила Исмағұлова, пианист Бейбарыс Смайылов және композитор Әліби Жанат шығады. Концертмейстерлер — Шахизада Құлсейітова мен Рахима Тойке.

8 тамызда сахна төрінде сопрано Алина Кулбаева, скрипкашылар Нұрия Қанифа Қадыржан мен Диана Мақажан, флейташы Афина Мавиди, фаготшы Абылай Жұмаке, пианистер Радия Оразалинова мен Жұлдыз Ержеңіс, сондай-ақ перкуссионист Айдар Фазылов өнер көрсетеді. Концертмейстер — Малика Аймақова.

Бағдарламада А.Жұбанов пен Л.Хамидидің «Абай» операсынан Ажардың ариясы, «Япурай» халық әні (Н.К.Қадыржан өңдеуінде), Әліби Жанаттың домбыра мен фортепианоға арналған вариациялары және басқа да ұлттық шығармалар орындалады. Сонымен қатар Моцарт, Бетховен, Верди, Лист, Брамс, Дебюсси, Рахманинов сынды әлемдік классиктердің туындылары шырқалады.

1 тамызда өтетін тағы бір ерекше кеш — «Биске орындалған пассакалия» концерті. Бұл кеште скрипкашы Айя Ғаббасова, пианист Анара Камелинова және Лондонда Иегуди Менухин мектебінде оқып жүрген виолончельші Азамат Мұхтарұлы көрермен назарына түрлі дәуірлердегі шығармаларды ұсынады. Бағдарламада Гендель – Хальворсеннің пассакалиясы, Шуманның «Фантастикалық пьесалары», Брамстың №1 фортепианолық триосы және Сарасатенің әйгілі «Сыған әуендері», сондай-ақ отандық авторлар Мансұр Сағатов пен Кенжебек Күмісбековтің шығармалары қамтылған.