Президент: “Әділетті қоғам боламыз десек, бір-бірімізге жанашыр болуымыз қажет”

Президент Қасым-Жомарт Тоқаев қоғамдағы жауапкершілік, азаматтардың бір-біріне құрметпен қарауы, қоғамдық тәртіпті сақтау және мемлекеттік тілдің мәртебесін көтеру мәселелеріне тоқталды. Мемлекет басшысы «Таза Қазақстан» идеясын жүзеге асырудың маңызын атап өтіп, «Заң мен Тәртіп» қағидаты әр азаматтың күнделікті өмірінің ажырамас бөлігіне айналуы керектігін айтты, деп хабарлайды MadeniPortal.kz.

Президент әділетті қоғам құру үшін әр адамның өз ісіне жауапкершілікпен қарауы маңызды екенін айтты. Сонымен қатар азаматтар бір-біріне жанашырлық танытып, табиғатқа қамқор болуы қажет. «Таза Қазақстан» идеясы тек қоршаған ортаны тазалаумен шектелмейді. Ол адамның ішкі мәдениеті, ниеті мен сөйлеу әдебінен де көрінуі тиіс.

Мемлекет басшысы өркениетті қоғамда адамдардың бір-біріне құрметпен қарауы керектігін жеткізді. Дөрекі сөйлеу, өзгелерді кемсіту, қоғамдық орындарды ластау, ортақ мүлікті бүлдіру сияқты әрекеттерге жол берілмеуі тиіс. 

Президент Қазақстанды жаңа өркениетті деңгейге көтеру жолында мемлекеттік тілдің маңызы ерекше екенін атап өтті. Қазақ тілінің мәртебесін арттыру, оны кеңінен қолдану және дәріптеу – тарихи міндет. 

Мемлекет басшысы «Заң мен Тәртіп» қағидаты ел өмірінің ажырамас бөлігіне айналуы керектігін айтты. Оның сөзінше, заң үстемдігі мен қоғамдық тәртіп мемлекеттің тұрақтылығын сақтап, тәуелсіздікті қорғауда маңызды рөл атқарады. 

Президент кейбір адамдардың «Заң мен Тәртіп» ұғымын теріс түсіндіріп, оны өзгелерге қысым жасау құралы ретінде көрсетуге тырысатынын айтты. Мемлекет басшысы мұндай әрекеттерді құптамайтынын жеткізіп, оған қатаң тосқауыл қою қажеттігін атап өтті.