Белгілі әнші, актриса Айгүл Иманбаева әлеуметтік желідегі парақшасында видео жариялады. Видео елдегі жемқорлық мәселесі төңірегінде. Аталған жарияланымды желі қолданушылары қызу талқылап жатыр, деп хабарлайды madeniportal.kz Azattyq Rýhy тілшісіне сілтеме жасап.

Бейнежазба орыс тілінде түсірілген. Жарияланымның астында «Елімізде жемқорлық жойылуы үшін,алдымен өзімізден бастайық» деп жазба қалдырылған.

  Видеода Айгүл Иманбаева көшеде өтіп бара жатқан жігітті тоқтатып, елімізде дәл қазіргі уақыттағы жемқорлық деңгейі туралы сұрайды. «Сіздің ойыңызша, елімізде қазір жемқорлық азайды ма, көбейді ме?» деген сауалға жауап берген жас жігіт жемқорлықтың ұлғайғанын алға тартады.

Содан кейін Айгүл Иманбаева камераны өшіртіп, жігітке керісінше жауап беруді өтінеді де, оның қолына ақша ұстатады. Ал жас жігіт еш ойланбастан келісіп, жоғарыдағы сұраққа басқаша жауап береді.

Ал желі қолданушылары бұл видеоны қызу талқылауда. Көпшілік әртістің видеоны орыс тілінде түсіргені үшін айыптап жатыр. «Қазақпен қазақша сөйлессеңдерші», «Қазақша сөйлемей ме?», «Ойбай, Айгүл қазақша ұмытып қалған ба?» деген пікірлер жазылды.

Сонымен қатар, желі қолданушылары Айгүлдің осы видеосы арқылы еліміздегі жемқорлық деңгейі анық көрініс тапқанын жарыса жазуда.