ХАМЕЛЕОННЫҢ ТҮСІ ҚАНДАЙ?

(Бауле ертегісі)

Есте жоқ ерте заманда, Ньямье құдай шартараптағы адам, аң, жан-жануар біткенді шақырту үшін жұмыр жерге елшілерін жұмсайды.

Бәрі жан-жақтан жиылған соң, ол былай деп жалпақ жаһанға жар шашады:

– Айтыңдар, қане! Жерде не қалайсыңдар, әрқайсың? Рұқсат етейін.

Сонда, алдыменен адам әңгімеге араласады:

– Ат басын ауылға бұрып, сонда егін ексем деймін.

– Ал, біз ну орманға орнықсақ, – деді аңдар.

 Тек хамелеон ғана тіс жармады.

– Сен не сұрайсың? – деді Ньямье.

– Былай ғой, – деді хамелеон. – Табаным тиген орынның барлығы маған тиесілі болса деген тілегім бар.

– Мақұл, – деді айтқаны өтіп, атқаны жетіп тұрған Ньямье. – Онда, ойға алғандарың орындалсын.

Міне, содан бері адамдар – ауылда, ал аңдар – орман-тоғайда тіршілік кешіп жүр. Ал, хамелеон қайда барса да, сол мекеннің қызылды-жасылды бояуына еніп, өз үйіндегідей алшаң басып, емін-еркін жүретін көрінеді.         

*Ньямье (Ньяме, Ньяма) – аспан құдайы, кейбір Батыс Африка елдері арасындағы басты тәңір боп есептеледі. 

Аударған: Қазақстан Жазушылар одағының 

мүшесі, жазушы-драматург, 

әдебиеттанушы, сыншы Әлібек БАЙБОЛ

Ертегі аудармашының рұқсатымен жарияланды. Авторлық құқық сақталғандықтан көшіріп басуға болмайды!