Шымкентте ҚР Мәдениет және ақпарат министрлігінің ұйымдастыруымен Өзбекстан Республикасы архивтерінің күндері өтуде, деп хабарлайды Мәдениет порталы ҚР Мәдениет және ақпарат министрлігінің баспасөз қызметіне сілтеме жасай отырып.

Іс-шара аясында «Қазақстан мен Өзбекстан тарихын зерттеудің өзекті мәселелері» тақырыбында халықаралық ғылыми-тәжірибелік конференция өтті.

Жиынға ҚР МАМ Архив, құжаттама және кітап ісі комитеті және «Узархив» агенттігінің, Шымкент қаласы әкімдігінің, Қазақстан және Өзбекстан Республикасының мемлекеттік архивтерінің өкілдері, сондай-ақ тарихшылар мен өлкетанушылар, мәдениет саласының қызметкерлері қатысты.

Конференцияда ҚР МАМ Архив, құжаттама және кітап ісі комитеті төрағасының орынбасары Роллан Құспан министр Аида Балаеваның құттықтау хатын оқыды.

Өз кезегінде Өзбекстан Республикасы Әділет министрлігі жанындағы «Узархив» агенттігі төрағасының орынбасары Шерзод Садықов екі ел арасындағы архивтік қарым-қатынасты нығайтып, жан-жақты дамытуға ведомство тарапынан барынша қолдау көрсетілетінін жеткізді.

Конференцияда тарихты зерттеудегі архив құжаттарының орны мен рөлі, архив саласының жағдайы және даму перспективалары, архивтік құжаттардың сақталуын қамтамасыз етудің заманауи технологиялары туралы жан-жақты талқыланды.

Сонымен қатар, екі мемлекеттің қор жинағынан "Қазақстан архивтеріндегі Өзбекстан мемлекетінің тарихы" және Өзбекстан Республикасы Узархив агенттінің "Өзбекстан архивтеріндегі Қазақстан мемлекетінің тарихы" көрмесі қойылды. Конференция модераторы ретінде Қазақстан Республикасының Ұлттық архивінің директоры Нұрланова Сағила Есімсейітқызы қатысты.