«23 бала уланған»: дәрігерлер Қытай кәмпитінің құрамы туралы тың дерек айтты

Ақтөбенің санитарлық дәрігерлері балалардың улануына себеп болған өнімнің құрамын анықтай алмай отыр, деп хабарлайды Madeniportal.kz Orda.kz-ке сілтеме жасап.

Қобда орта мектебінің 23 оқушысы уланған өнімнің құрамында не бар екенін анықтау әлі күнге мүмкін болмады. Мұның негізгі себебі өнімнің қазақ және орыс тілдерінде таңбаланбағандығынан.

26 ақпанда Ақтөбе облысының санитарлық-эпидемиологиялық бақылау департаментінің басшысы Райхан Қойшанова өнімнің зерттеу нәтижелері дайын екенін хабарлады.

«Зерттеу барысында өнімнің кеденнің техникалық регламентінің талаптарына сәйкес келмейтіні анықталды. Атап айтқанда: атауы, құрамы, жарамдылық мерзімі, сақтау шарттары, пайдалану бойынша шектеулер, тағамдық құндылық көрсеткіштері мемлекеттік және орыс тілдерінде таңбаланбаған», деп атап өтті департамент басшысы.

Райхан Қойшанованың айтуынша, тағамдардың құрамын зерттеуге тіл кедергі келтірген екен.

«Композиция жазылмаған, сондықтан олар бойынша микробиологиялық және санитарлық-химиялық көрсеткіштерге арналған зерттеулер жүргізілмеді» — деді Райхан Қойшанова.

Оның айтуынша, қазір қадағалау органдары мұндай өнімдердің сауда орындарында қалай пайда болғанын анықтап жатыр.