8, 6 және 1 жаста еді: Жетісуда өрттен қаза тапқан үш бала жерленді

Жетісу облысы Ескелді ауданына қарасты Бақтыбай ауылындағы жойқын өрттен қаза тапқан 8, 6 және 1 жастағы үш бала Талдықорған қаласының маңында жер қойнына тапсырылды, деп хабарлайды MadeniPortal.kz.

Бұл туралы КТК жазды. Қайғы жамылған отбасы Бақтыбай ауылында бір жылдан бері жалдамалы үйде тұрған. Отбасында төрт бала тәрбиеленген, тек отағасы жұмыс істеген. Жергілікті әкімдіктің мәліметінше, отбасы Талдықорғанда тұрғын үй кезегінде тұрған, ал Ескелді ауданында уақытша баспана жалдап келген.

Қайғылы оқиға болған күні 38 жастағы отағасы таңертең ерте Талдықорғанға жұмысқа кеткен. Өрт таңғы сағат 7-ден асқанда басталған.

Қалың түтінге оранған үйден 34 жастағы ана мен оның 14 жастағы үлкен ұлы ғана сыртқа шығып үлгерген. Олар дереу көршілерден көмек сұраған.

Көршілердің бірі жанып жатқан үйге кіріп, балалардың бірін терезе арқылы сыртқа алып шыққан. Алайда бала түтінге тұншығып, оны аман алып қалу мүмкін болмаған. Тағы екі бала үйдің ішінде қалып қойған.

Ауыл тұрғыны Салтанат Мухиева сол сәтте көршілердің балаларды құтқаруға әрекет жасағанын айтты.

Өрт салдарынан отбасындағы үш бала қаза тапты.

Ескелді ауданының әкімдігі жерлеу рәсімін ұйымдастыруға қажетті көмек көрсеткен. Сондай-ақ қара жамылған отбасына Бақтыбай ауылынан уақытша баспана тауып беру жоспарланып отыр.