«Әкесі екі ұлын жерледі»: Астанада босанған әйелдің туыстары перинаталдық орталықты тексеруді сұрады

Астанада босанған әйелдің туыстары Тәуелсіздік көшесіндегі перинаталдық орталықтың жұмысын тексеруді сұрап, Денсаулық сақтау министрлігіне үндеу жасады. Отбасы егіз сәбиден айырылғанын айтып, медициналық көмек көрсету барысында жіберілген болуы мүмкін кемшіліктерге құқықтық және кәсіби баға беруді талап етіп отыр, деп хабарлады MadeniPortal.kz.

Үндеу авторының айтуынша, туысы Әсел егіз балаға жүкті болған. Жүктіліктің алтыншы айында сәбилердің бірі шетінеп кеткен. Отбасының сөзінше, дәрігерлер екінші баланы сақтап қалу үшін жүктілікті жалғастыруға болатынын айтқан.

Арада бірнеше апта өткенде әйелдің жағдайы нашарлай бастаған. Туыстары оның іш тұсындағы тері алдымен қызарып, кейін көгергенін айтады. Әйел бастапқыда дерматологқа жіберіліп, кейін антибиотиктермен емделген. Артынша №6 емхана арқылы перинаталдық орталыққа жатқызылған.

Отбасының мәлімдеуінше, орталыққа түскен кезде әйелдің бірқатар анализ көрсеткіші өте нашар болған. Алайда туыстары үш күн бойы шұғыл босандыру туралы шешім қабылданбағанын алға тартады.

Олардың айтуынша, iKomek 109 қызметіне шағымданғаннан кейін әйелді дәрігер қарап, шұғыл операция жасау туралы шешім қабылдаған.

Алайда отбасының айтуынша, нәресте бір тәуліктен кейін көз жұмған. Туыстары сәбиге сепсис диагнозы қойылғанын мәлімдеді.

Қазір отбасы ана мен баланың өліміне дейін көрсетілген медициналық көмектің сапасын жан-жақты тексеруді сұрап отыр. Медицина қызметкерлерінің әрекеті мен сәбидің өлімі арасында себеп-салдарлық байланыс бар-жоғы әзірге ресми түрде анықталған жоқ. Оны тиісті медициналық сараптама мен тексеру анықтауы тиіс.

Туыстары екі баласынан айырылған әйелдің психологиялық жағдайына да алаңдап отыр.

Отбасы бір күн ғана өмір сүрген сәбиге Арлан деген есім берген.

Туыстары Денсаулық сақтау министрлігінен перинаталдық орталықта тексеру жүргізіп, болған жағдайдың барлық мән-жайын анықтауды және медицина қызметкерлерінің әрекетіне баға беруді сұрады.

Әзірге перинаталдық орталық пен Астана қаласының денсаулық сақтау басқармасының бұл мәлімдемеге қатысты ресми пікірі жарияланған жоқ.

 

Посмотреть в Threads