Алматы облысында ер адам әйелін сыммен тұншықтырмақ болды

Алматы облысында әйелге жасалған қатыгез шабуылға қатысты сот ісі аяқталды. Қылмыстың саралануы қоғамда үлкен резонанс тудырды, деп хабарлайды MadeniPortal.kz.

Жәбірленушінің адвокатының айтуынша, оқиға қызғаныштан туындаған. Ер адам әйелін адам аяғы сирек баратын жерге апарып, өлтіретінін айтып қорқытқан. Алдын ала қолғап киіп алған ол электр сымын шығарып, әйелді тұншықтыра бастаған.

Жәбірленуші А. есінен танып қалған. Кездейсоқ куәгердің пайда болғанын көргеннен кейін ғана шабуыл жасаушы әрекетін тоқтатқан.

Осыдан кейін ер адам әйеліне болған оқиға туралы біреуге айтса, өлтіретінін айтып тағы да қорқытқан. Кейін жұмыс орнында әйел қайтадан есінен танып қалған. Дәрігерлер тұншықтыру салдарынан оның дауыс байламдары зақымданғанын анықтаған.

Сот барысында ерлі-зайыптылардың 20 жастағы қызы отбасының 10 жылдық ортақ өмірінде тұрмыстық зорлық-зомбылықтың үнемі болғанын мәлімдеді.

Алайда істің мән-жайына және әйелдің алған ауыр жарақаттарына қарамастан, сот ер адамның әрекетін «Ұрып-соғу» бабы бойынша саралап, оған 25 тәулік әкімшілік қамау жазасын тағайындады.

Жәбірленушінің адвокаты сот шешімімен үзілді-кесілді келіспейтінін айтып, ер адамның әрекетінде адам өлтіруге оқталудың айқын белгілері бар екенін мәлімдеді.