Ақпан айында ауа райы қандай болады?

Қазгидромет синоптиктері 2025 жылдың ақпанға арналған ауа райы болжамын жариялады, деп хабарлайды madeniportal.kz. 

Синоптиктер температураның күрт ауытқуын, аяз бен жылымық, сондай-ақ қар мен жаңбыр түрінде жауын-шашын болатынын болжайды.

Айдың бірінші онкүндігінде Қазақстанға солтүстік-батыс циклоны ықпал етеді, қар мен жаңбыр әкеледі. Тұман, көктайғақ және екпінді жел күтіледі. Температура ауытқиды.

Республика батысы мен оңтүстігінде күндіз температура 0…+10 градусқа дейін көтеріледі. Солтүстік өңірлерде түнде -2…-7, күндіз -4…+1 градус болады. Орталық және шығыс облыстарда түнде температура -12…-20 градусқа дейін төмендейді, бірақ күндіз 0…-8 градус болады.

Айдың бірінші онкүндігінің екінші жартысында Қазақстанға Салехард аудандарынан қуатты арктикалық суық келеді. Температура күрт төмендейді. Солтүстік өңірлерде түнде -28…-35, күндіз -20…-25 градус болады. Оңтүстік облыстарда түнде -13…-20, күндіз -5…-12 градус түседі. Оңтүстік облыстардың таулы аймақтары мен солтүстігінде түнде термометр бағаны -30 градусқа дейін төмендеп, күндіз -20 градус болады.

Синоптиктердің болжамы бойынша, ақпанның екінші және үшінші онкүндіктерінде аязды күндер жылы күндермен ауысып отырады, қар жауады, тұман мен көктайғақ болады. Республика оңтүстігі мен оңтүстік-шығысында тауларда күшті жауын-шашын (жаңбыр, қар) болуы мүмкін.

Айдың соңында жаңа суық және жылыну толқындары күтіледі. Антициклонның енуі кезінде температура төмендейді екен. Солтүстік және орталық өңірлерде түнде -25…-35, күндіз -15…-25 градус болады. Оңтүстік және оңтүстік-батыс облыстарда түнде -12…-22, күндіз -3…-15 градус болады.