Елордада ерекше жандардың мүддесін қорғау бойынша маңызды іс-шара өтті

Бүгін елордада "Өзгерістерге қадам: мемлекеттік органдар мен отбасыларды қолдау мәселелері бойынша өзара іс-қимыл" семинары өткізілді, деп хабарлайды MADENIPORTAL.KZ.

Астана қаласы Ішкі саясат басқармасының қолдауымен «Бақытты Шаңырақ» Қоғамдық қоры «Елорда тұрғындарының бастамашыл топтарын қолдау» жобасын жүзеге асыруда. 

Осы жоба аясында бүгін Астана қаласында "Өзгерістерге қадам: мемлекеттік органдар мен отбасыларды қолдау мәселелері бойынша өзара іс-қимыл" тақырыбында семинар өтті. Семинарға негізгі қатысушылар азаматтық сектор өкілдері, елорда тұрғындарының бастамашыл топтары мен ата-аналар болды. 

“Бақытты Шаңырақ” Қоғамдық қорының іс-шараны өткізудегі мақсаты: мүгедектігі бар балалардың ата-аналары мен ересек мүгедектігі бар адамдардың заңшығарушы билік өкілдерімен әлеуметтік қолдау мәселелерін талқылауы және мемлекеттік органдар мен тиімді өзара іс-қимыл тетіктерін ұсынуы.

Бүгінгі ҚР Парламенті Мәжілісінің депутаты Тансауле Серіковтің қатысуымен өткен семинарда мынадай 3 тақырып қозғалды:

1.Ортопедиялық аяқ киімді монетизациялау.

2.Санаторлық-курорттық емдеуді монетизациялау.

3.Мүгедектігі бар баланы тәрбиелеп отырған ата-ананың біріне зейнеткерлік жасын төмендету. 

Семинар барысында ата-аналар депутатқа сұрақтарын қойып, мәселелерін талқылады. Нәтижесінде, «Бақытты Шаңырақ» ҚҚ жетекшісі Ботагөз Сұлтанова қазіргі таңда мегедектігі бар балалар мен олардың ата-анасы үшін өзекті болып отырған жоғарыда айтылған мәселелер бойынша депутат Тансауле Серіковтің атына хат жолдайтын болды. 

Депутат Тансауле Серіков өз сөзінде, Салық кодексіне, мүгедектігі бар бала тәрбиелейтін ата-анасының бірін жеке табыс салығынан 5000 АЕК-ге босатуы туралы ұсыныс тастағанын айтты. 

Астана қаласында 36 000-нан астам мүгедек адам тұрады, оның 26 000-нан астамы ересектер, 10 000-нан астамы балалар, деп хабарлайды елорда әкімдігінің ресми сайты.

2024 жылы мүгедектігі бар адамдарды техникалық оңалту құралдарымен және қызметтермен қамтамасыз етуге 37 мыңнан астам түрлі құралдар ұсынылды: протездік-ортопедиялық көмек,сурдологиялық көмек, кресло-арбалар, санаторий-курорттық емдеу және т. б.

2024 жылы 7 761 адам арнайы әлеуметтік қызметтер алды. Бұл қызметтер 11 ведомстволық бағынысты мекемелерде көрсетіледі. Негізгі мекемелердің арасында:
1. «Шарапат» әлеуметтік қызмет көрсету орталығы;
2. «Нұрлы жүрек» орталығы;
3. «Қамқор» орталығы;
4. «Демеу» қайта әлеуметтендіру орталығы;
5. «Үміт» дағдарыс орталығы;
6. «Жансая» орталығы және т.б.;

2024 жылы әлеуметтік қызмет көрсететін үкіметтік емес ұйымдардың саны артты.

Олар:
* «Балам-ай» ҚҚ-жартылай стационарда 414 адам.
* «Erekshe analar» ҚҚ — жартылай стационарда 413 адам.
* «Астана қаласының мүгедек балалар қоғамы»ҚБ-үйде 398 адам.
* «Орда»ҚБ (аутизмі бар балалар) — үйде 719 адам (18 жасқа дейін), 18 жастан асқан 11 адам.
* «Береке Астана мүгедектер бірлестігі» ҚБ-593 адам үйде, 413 адам жартылай стационарда.
* «Солнечный мир» ҚҚ- 136 адам.
* «АСТ Астана әлеуметтік технологиялар» ҚБ-жартылай стационарда 357 адам.
* «Қорғау -Дағдарыс орталығы»- 410 адам.