Қарағандыдағы ЖОО-да туберкулез анықталды: студенттердің бір бөлігі қашықтан оқуға көшті

Қарағандыдағы Е.А. Бөкетов атындағы Қарағанды ұлттық зерттеу университетінің үш студентінен туберкулез анықталды. Қазір санитариялық мамандар эпидемиологиялық тексеру жүргізіп, науқастармен байланыста болған адамдарды анықтап жатыр, деп хабарлады MadeniPortal.kz.

Бұл туралы Қазақпарат жазды. Қазыбек би атындағы аудандық санитариялық-эпидемиологиялық бақылау басқармасының басшысы Нұрлан Аймағанбетов әлеуметтік желілерде тараған 10 студент ауырды деген ақпаратты жоққа шығарды. Ресми түрде үш жағдай тіркелген.

Сырқаттанған студенттер журналистика, биология және шет тілдері бағыттарында білім алады. Олар әртүрлі оқу корпустарында оқиды және бір жатақханада тұрмайды.

Ауру анықталғаннан кейін екі оқу корпусында және студенттердің тұрғылықты жерлерінде қорытынды дезинфекция жүргізілген. Мамандар университетте карантин жарияланбағанын атап өтті.

Университет мәліметінше, профилактикалық шаралар кезінде жекелеген топтар уақытша қашықтан оқытуға ауыстырылған. Науқастармен жақын байланыста болған адамдар 14 күн медициналық бақылауда болады.

Қазір үш студентте туберкулездің қай түрі анықталғаны және инфекцияның нақты қайдан жұққаны тексеріліп жатыр. Оқу үдерісі, уақытша шектеулерді қоспағанда, қалыпты режимде жалғасуда.