«Кешіріңіздер»: 12 адамның өліміне қатысты кафе иесі кінәсін мойындады

Щучинск қаласындағы «Центр плова» дәмханасында болған жойқын жарылысқа қатысты сот аяқталуға жақын. 12 адамның өмірін қиған қайғылы оқиға бойынша басты айыпталушы – дәмхана иесі Хасан Мусхажиев соңғы сөзінде кінәсін мойындап, марқұмдардың жақындары мен зардап шеккендерден кешірім сұрады, деп хабарлады  MadeniPortal.kz.

Бұл туралы КТК жазды. Қайғылы жағдай шамамен жарты жыл бұрын болған. Дәмханада газ баллоны жарылып, артынша алапат өрт шыққан. Салдарынан 12 адам көз жұмды. Олардың 10-ы дәмхана қызметкері болса, тағы екеуі тамақтануға келген тұрғындар.

Соттағы соңғы сөзінде Хасан Мусхажиев дәмхана жұмысын, соның ішінде өрт қауіпсіздігі талаптарының сақталуын тиісті деңгейде бақыламағанын мойындады.

Алайда кафе иесі прокурор сұраған 7 жыл бас бостандығынан айыру жазасымен келіспейтінін жеткізді.

Іс бойынша автогаз құю станциясының директоры мен газ баллондарын тасымалдаушы да жауапқа тартылып жатыр. Оларға қауіпсіздік талаптарына сай келмейтін қызмет көрсету бойынша айып тағылған. АГҚС директоры жарылысқа қатысы жоқ екенін айтып, тағылған айыппен келіспеді.

Зардап шеккендердің де пікірі әртүрлі. Кейбірі кафе иесін босатуды сұраса, енді бірі қайғылы жағдайға дәмхана басшысын кінәлі деп санайды. Ал бірқатар жәбірленуші барлық айыпталушыға барынша қатаң жаза тағайындауды талап еткен.

Іс бойынша сот шешімі келесі аптада шығарылады деп күтілуде.