Мәйітті ашпай-ақ өлім себебін анықтай ма: Қазақстанда жаңа әдіс енгізілді

Қазақстанда сот-медициналық сараптама жүргізу кезінде мәйітті компьютерлік томография арқылы зерттеу мүмкіндігі енгізілді. Тиісті өзгерістер Әділет министрлігінің сот сараптамаларын ұйымдастыру және жүргізу қағидаларына енгізілген, деп хабарлады MadeniPortal.kz.

Жаңа тәртіп бойынша мәйітке сараптама өлім себебін анықтау және тергеу барысында қойылған басқа да сұрақтарға жауап беру мақсатында жүргізіледі. Негізгі әдіс ретінде мәйітті ашып зерттеу сақталады, алайда қажет болған жағдайда және тиісті жабдық бар болса, компьютерлік томография қолданылуы мүмкін.

Бұл технологияны енгізу мәселесі бұған дейін де көтерілген. 2025 жылы Әділет министрі Ерлан Сәрсембаев компьютерлік томография арқылы «виртуалды аутопсия» жүргізу тәсілін түсіндірген еді. Оның сөзінше, КТ зерттеуі күш қолданудан болған өлім белгілерін анықтамаса, кей жағдайларда мәйітті ашудың қажеттілігі болмауы мүмкін. Ал зорлық-зомбылық немесе басқа сыртқы әсер белгілері байқалса, қылмыстық қудалау органының қаулысына сәйкес дәстүрлі сараптама жүргізіледі.

Жаңа талаптарға сәйкес, сот сараптамасы бөлімшелерін жабдықтау нормативіне бір компьютерлік томографенгізілді. Ал КТ жүргізілетін арнайы бөлменің есептік ауданы 73 шаршы метр болуы тиіс.

Сонымен қатар мәйіттің сот-медициналық сараптамасын күндізгі уақытта табиғи жарықта жүргізу талабы бекітілген. Ведомство мұны жарақаттар мен басқа өзгерістерді сипаттау және бағалау кезінде сараптамалық қателердің алдын алу қажеттілігімен түсіндіреді.