Өлтіруге тапсырыс бергендер бостандыққа шыққан. Дау қайта жалғаса ма?

Қызылордада кәсіпкер Хансейіт Мектепбаевты өлтіруге тапсырыс берген базар басшылары жақында бостандыққа шыққан. Кәсіпкер базардағы орынға таластан басталған дау енді қайта жалғаса ма деп қорқады, деп жазады madeniportal.kz тілшісі stan.kz сілтеме жасап.

Осыдан екі жыл бұрын Хансейіт Мектепбаевтың үйіне келіп, тапа-тал түсте оқ жаудырған азаматтардың әрекеті дүйім жұртты дүр сілкіндірген еді. Оқиға кезінде үш адам көз жұмған болатын. Бірнеше көлікпен келген азаматтардың кәсіпкердің үйіне баса-көктеп кіргені мен атыс кезі бейнебақылау камерасына түсіп қалған. Қылмыстық әрекет кезінде Хансейіттің інісі мен тағы екі азамат көз жұмды. Кәсіпкердің айтуынша, ол кезде қаскөйлер базар басшыларының бұйырығымен өзін өлтіруге келген екен. Ал атыс жасаған адамдардың барлығы жазаларын алған. Бірақ оларды жалдаған азаматтардың жақында бостандыққа шыққанын естігенде төбемнен жай түскендей болды дейді кәсіпкер.

Хансейіттің сөзінше, атыстың алдында да қаскөйлер өзін бірнеше рет ұрлап әкетіп, қастандық жасағылары келген. Одан кейін де талай таяқ жедім дейді. 

Ал облыстық соттың баспасөз қызметіндегілер базар басшыларының адам жалдап Хансейітті ұрлап әкетуге әрекет жасағандары дәлелденді дейді. Сондықтан оларға бастапқыда “адам ұрлау” бабымен айып тағылғанын мәлімдеді. Бірақ кейін бұл іс “Өзінше билік ету” бабына ауысқан екен.

Сотталушылар қамауға алынып тергеуде отырған уақытта жазаларын өтеген дейді соттың баспасөз қызметіндегілер. Ал Хансейіт Мектепбаев өз өмірі үшін алаңдайды. Енді ол әділдік іздеп жоғары сотқа шағымданбақшы.