Қазақмыс жұмыскерлер қауіпсіздігіне арналған ауқымды бағдарлама бастады

1 маусымнан бастап «Қазақмыс» корпорациясында аса қауіпті тәуекелдерді басқаруға арналған ауқымды коммуникациялық науқан іске қосылды, деп хабарлайды MadeniPortal.kz.

Алты айға жоспарланған жоба өндірістегі қауіпсіздік мәдениетін дамытуға, еңбек тәртібін нығайтуға және қызметкерлер арасында қауіпсіз жұмыс істеу дағдыларын қалыптастыруға бағытталған.

Бастама компания жариялаған Қауіпсіздік жылы аясында жүзеге асырылуда және барлық өндірістік бөлімшелерді қамтиды. Бағдарламаның негізгі мақсаты – қауіпсіздік талаптарын әрбір жұмыскерге түсінікті тілде жеткізіп, жазатайым оқиғалардың алдын алуға көмектесетін маңызды ережелерді күнделікті тәжірибеге енгізу.

Компания өндірістік процестер мен ішкі статистиканы талдау нәтижесінде еңбек қауіпсіздігіне қатысты бірқатар негізгі стандарттарды жаңартқан. Мамандардың айтуынша, талаптардың мазмұны өзгерген жоқ, алайда құжаттар қызметкерлер үшін барынша түсінікті әрі қолдануға ыңғайлы болатындай етіп қайта әзірленген.

Науқан аясында әр ай белгілі бір қауіпсіздік тақырыбына арналады. Алғашқы тақырып ретінде жабдықтарды жөндеу және техникалық қызмет көрсету кезінде қолданылатын қауіпті энергия көздерін оқшаулау жүйесі таңдалды. Бұл бағыттағы басты қағида – «Бұғаттаусыз жұмысқа кіріспе».

Аталған жүйе бойынша жөндеу немесе қызмет көрсету жұмыстары басталар алдында жабдық арнайы жеке қорғаныс құлпымен бұғатталуы тиіс. Құлыпты орнатқан қызметкер оны өзі шешкенге дейін құрылғыны іске қосу мүмкін болмайды. Бұл тәсіл техниканың кездейсоқ қосылып кету қаупін азайтып, өндірістегі жарақаттану жағдайларының алдын алуға мүмкіндік береді.

«Қазақмыс» компаниясының еңбекті қорғау жөніндегі басқарушы директоры Жанбек Есмахановтың айтуынша, қауіпсіздік мәселесінде әр жұмыскердің жауапкершілігі ерекше маңызды.

«Біздің басты міндетіміз – әрбір жұмыскердің жұмыс ауысымы аяқталған соң үйіне аман-есен оралуын қамтамасыз ету. Компания барлық қажетті қорғаныс құралдарын береді, алайда қауіпсіздік талаптарының сақталуы әр адамның әрекетіне байланысты. Сондықтан қауіпсіздік ережелері бұзылған жағдайда кез келген қызметкер жұмысты тоқтатуға құқылы және тиіс», – деді ол.

Науқан өндірістегі оқыс оқиғаларды талдау қорытындыларына негізделген. Бағдарлама қауіпті энергиямен жұмыс істеудің нақты тәртібін түсіндіруге бағытталған. Оған энергия көздерін анықтау, толық ажырату, қалдық қысымды түсіру және жұмысты бастар алдында энергияның жоқ екеніне көз жеткізу сияқты маңызды талаптар кіреді.

Компания бұл бастама арқылы қауіпсіздік талаптарын өндірістік мәдениеттің ажырамас бөлігіне айналдырып, барлық өндірістік нысандардағы қызметкерлердің қорғалу деңгейін арттыруды көздеп отыр.