Қазақстанда кейбір отбасыларға жәрдемақы төлеу тоқтатылуы мүмкін

Қазақстанда бала күтіміне, көпбалалы отбасыларға және марапатталған аналарға жәрдемақы төлеу тәртібі өзгеріп жатыр. Енді әлеуметтік төлемдерді тағайындау кезінде отбасының тұрмыстық жағдайы Цифрлық отбасы картасы арқылы бағаланады, деп хабарлайды MadeniPortal.kz Еңбек және халықты әлеуметтік қорғау министрлігіне сілтеме жасап.

Жаңа тәртіпке сәйкес, отбасылар әлеуметтік әл-ауқат деңгейіне қарай бес санатқа бөлінеді. А және В санаттарына тұрмысы жоғары отбасылар жатқызылса, C, D және E санаттары әлеуметтік қолдауды қажет ететін азаматтарды қамтиды.

2027 жылғы 1 қаңтардан бастап жәрдемақының жекелеген түрлерін тағайындау кезінде осы санаттар ескеріледі. Атап айтқанда, А немесе В санатына кірген отбасыларға кейбір әлеуметтік төлемдерді беру шектелуі мүмкін.

Егер жәрдемақы алушының әлеуметтік жағдайы өзгеріп, отбасы C, D немесе E санатына ауысса, тиісті төлемді қайта жалғастыру қарастырылған.

Жәрдемақы рәсімдеуде не өзгереді?

30 қазандағы бұйрықпен бала тууына, бала күтіміне, көпбалалы отбасылар мен марапатталған аналарға берілетін жәрдемақыларды рәсімдеу тәртібіне де түзетулер енгізілген.

18 қарашадан бастап бала тууын тіркеу кезінде ата-аналар жәрдемақы тағайындау қызметін қатар ала алады.

Сонымен қатар өтініште қате анықталса немесе құжаттар толық болмаса, оны түзетуге екі жұмыс күні беріледі. Кемшілік уақытында жойылса, өтініштің бастапқы берілген күні сақталады.

Жәрдемақы рәсімдеу барысында мемлекеттік ақпараттық жүйелердегі мәліметтер пайдаланылады. Қажетті ақпарат электронды түрде расталған жағдайда азаматтардан кейбір құжаттарды қайта ұсыну талап етілмейді.

Министрлік жаңа тәсілдің мақсаты әлеуметтік көмекті нақты мұқтаж отбасыларға бағыттау екенін түсіндірді.

Бұл ретте өзгерістер барлық жәрдемақыға бірдей қатысты емес. Ведомство мәліметінше, 36 түрлі бюджеттік жәрдемақының 22-сі отбасының табысы мен әлеуметтік жағдайына қарамастан бұрынғы тәртіппен тағайындала береді.