Қазақстаннан Дубайға әуе рейстері 15 шілдеден қайта іске қосылады

Қазақстан мен Дубай арасындағы тұрақты әуе қатынасы 15 шілдеден бастап қайта қалпына келтіріледі.Алайда Таяу Шығыстағы жағдайдың дамуына байланысты рейстер кестесіне өзгерістер енгізілуі мүмкін, деп хабарлады MadeniPortal.kz.

Air Astana әуе компаниясының мәліметінше, 15 шілдеден бастап Алматы – Дубай – Алматы және Астана – Дубай – Астана бағыттары бойынша тұрақты рейстерді қайта бастау жоспарланып отыр.

Сонымен қатар, тасымалдаушы Таяу Шығыстағы ахуалды жіті бақылап отырғанын мәлімдеді. Жағдайдың өзгеруіне қарай ұшу кестесіне түзетулер енгізілуі мүмкін.

Компания өкілдерінің айтуынша, өңірдегі оқиғалар мұқият қадағаланып отыр.

Рейстердің қайта жандануы уақытша енгізілген шектеулерден бірнеше күн өткен соң жүзеге аспақ. Еске салсақ, 12 шілдеде Таяу Шығыстағы шиеленістің күшеюіне байланысты Дубай бағытындағы рейстерге өзгерістер енгізілген болатын.

Атап айтқанда, таңғы сағат 07:10-да Астанадан Дубайға ұшып шыққан KC205 рейсі әуеде бағытын өзгертіп, қайтадан ұшып шыққан әуежайға оралды. Ал сол күні сағат 08:50-де ұшуы тиіс KC897 Алматы – Дубай рейсі мүлде тоқтатылды.

Сол кезде әуе компаниясы рейсі тоқтатылған жолаушылар билет құнын толық көлемде сатып алған жері арқылы қайтара алатынын хабарлаған.

Бұдан бөлек, жолаушыларға рейс мәртебесін алдын ала тексеріп отыру ұсынылды, өйткені ұшу және қону уақыты өзгеруі мүмкін болған. Сондай-ақ компания өңірдегі жағдайды бақылауды жалғастырып, жолаушыларды елге қайтаруға қатысты мәселелерді шешіп жатқанын мәлімдеген.

Бұл – Дубай бағыты бойынша рейстердің өңірдегі жағдайға байланысты уақытша өзгеріске ұшыраған алғашқы жағдай емес. Биыл наурыз айының басында да Air Astana Алматы мен Астанадан Дубайға қатынайтын рейстерді уақытша тоқтатып, кейін қайта жандандырған болатын. Ол кезде де себеп ретінде Таяу Шығыстағы ахуал аталған.

Біріккен Араб Әмірліктеріне сапарлауды жоспарлаған жолаушыларға рейстердің өзекті мәртебесін тұрақты түрде қадағалап отыру ұсынылады. Қосымша өзгерістер болған жағдайда әуе компаниясы бұл туралы дер кезінде хабарлайтынын мәлімдеді. Ақпарат алу үшін жолаушылар Air Astana компаниясының ресми сайты, онлайн-чат, WhatsApp қызметі немесе тәулік бойы жұмыс істейтін қолдау орталығы арқылы хабарласа алады.