Рамазан айында не істеуге болмайды?

Рамазан – мұсылман қауымы үшін ерекше рухани кезең. Бұл айда ораза ұстау арқылы адам нәпсісін тәрбиелеп, сабырын шыңдап, Жаратушыға деген құлшылығын арттырады. Алайда Рамазан тек аш жүрумен шектелмейді. Бұл – мінез-құлықты түзеп, жаман әдеттерден арылатын уақыт. Сондықтан Рамазан айында қандай әрекеттерден тыйылу керектігін білу маңызды екенін MadeniPortal.kz ескертеді. 

Оразаны бұзатын әрекеттер

Ең алдымен, таң атқаннан күн батқанға дейін әдейі тамақ жеу немесе су ішу оразаны бұзады. Егер адам ұмытып ішіп қойса, оразасы сақталады. Бірақ саналы түрде ішіп-жеу – оразаның жарамсыз болуына себеп болады.

Темекі шегу де оразаны бұзады. Себебі түтін мен оның құрамы ағзаға енеді. Сондықтан ораза кезінде темекіден толық бас тарту қажет.

Сондай-ақ күндізгі уақытта ерлі-зайыптылардың жыныстық қатынасқа түсуі де оразаны бұзады. Бұл жағдайда шариғатта арнайы өтем (кәффарат) қарастырылған. Ал түнгі уақытта мұндай қатынасқа рұқсат етіледі.

Қасақана құсу да оразаны бұзады. Ал еріксіз болған жағдайда ораза жарамды болып қала береді.

Рухани тұрғыдан тыйым салынатын әрекеттер

Рамазан – тек физикалық тыйылу емес, рухани тазалық айы. Сондықтан өтірік айту, өсек тарату, ғайбат сөз айту, біреуді ренжіту – оразаның сауабын азайтатын әрекеттер. Пайғамбарымыз (с.ғ.с.) жаман сөз бен жаман істен тыйылмаған адамның аш жүруінің мәні жоқ екенін ескерткен.

Ұрыс-керіс пен ашуға берілу де бұл айдың рухына қайшы. Рамазан – сабыр мен кешірім айы. Егер біреу жанжал шығарса, сабыр сақтап, дауласудан аулақ болған дұрыс.

Құлшылыққа немқұрайлы қарау

Ораза ұстап жүріп, намазды әдейі қалдыру – үлкен қателік. Рамазан – құлшылықты күшейтетін кезең. Сондықтан парыз намаздарды уақытында оқу, Құран оқу, дұға жасау – бұл айда ерекше маңызға ие.

Ысырапшылдық пен дарақылық

Кейде ауызашар дастарханы шектен тыс толтырылып, ысырапқа жол беріледі. Рамазанның мәні – қарапайымдылық пен шүкіршілік. Сондықтан ас-тағамды мөлшермен дайындап, мұқтаж жандармен бөлісу – сауапты іс.