Ресми некеде болмаған: Жезқазғанда төрт баланың анасын аяусыз өлтіріп кетті

Жезқазған маңындағы Жәйрем кентінде қайғылы оқиға орын алды. 42 жастағы Айгерім есімді төрт баланың анасы бірге тұрған азаматтың қолынан қаза тапты. Әйелге 20 рет пышақ салынған, деп хабарлайды MadeniPortal.kz bairaqmedia.kz-ке сілтеме жасап. 

Марқұмның әпкесі Дана Tengrinews.kz сайтына оның өмірі мен қайғылы жағдайға дейінгі оқиғалар туралы айтып берді. 

Айгерім өз еңбегімен табыс тауып, балаларын толық қамтамасыз еткен. Ол дүкен сатып алып, бірнеше пәтер иеленіп, жалға беру арқылы табыс тапқан.

Оның төрт баласы бар: үлкені студент, екіншісі мектепте үздік оқиды және шахматпен айналысады. Кіші екі баланың бірі – мүмкіндігі шектеулі қыз. Айгерім қызының денсаулығын қалпына келтіру үшін бар күшін салған.

Жақындарының айтуынша, ол өте мейірімді, жанашыр адам болған. 

Айгерім бірге тұрған ер адаммен ресми некеде болмаған. Бастапқыда ер адам қамқор көрінгенімен, уақыт өте агрессия, қызғаныш және зорлық-зомбылық көрсете бастаған.

Ол жұмыс істемеген, алкогольге тәуелді болған. Айгерім оны асырап, емдетіп, тіпті Астана қаласындағы дәрігерлерге де қаратуға тырысқан. Соған қарамастан, ер адам бірнеше рет қол көтеріп, жанжал шығарған.

Туыстарының сөзінше, әйел бірнеше рет полицияға жүгінгенімен, жағдай өзгермеген. 

Айгерім ақыры қарым-қатынасты тоқтатуға шешім қабылдап, ер адамды жалға берілетін пәтеріне жіберген. Алайда бұл шешім трагедияның алдын ала алмады.

Қайғылы оқиға күндіз, оның дүкенінде болған. Ер адам әйелге пышақпен шабуыл жасап, 20 рет жарақаттаған. Кейін өзі де жарақат алуға әрекет жасаған, бірақ аман қалған.

Қылмыстық іс «аса қатыгездікпен жасалған кісі өлтіру» бабы бойынша қозғалды. 

Ұлытау облысының полициясы күдіктінің ауруханада күзетпен жатқанын хабарлады. Ол емделгеннен кейін тергеу изоляторына ауыстырылады. Іс бақылауда. 

Қазір балалар ауыр психологиялық күйде. Үлкені болған жағдайды түсінсе, кішілері анасының қайтыс болғанын толық ұғына алмай отыр.

Туыстары бұл қайғылы оқиғаның алдын алуға болар еді деп есептейді. Қазір олар әділ тергеу жүргізіліп, балаларға қамқорлық рәсімделуін талап етуде.