Шавкат Рахмоновтың жұбайына қатысты іс бойынша ҚР ІІМ мәлімдеме жасады

Жамбыл облысындағы қайғылы жол апатынан кейін жарты жыл өткен соң тергеу белсенді кезеңге өтті. Қазақстан Республикасы Ішкі істер министрлігі UFC-дің белгілі файтері Шавкат Рахмоновтың жұбайы Гулайым Рахмонованың іс бойынша процессуалдық мәртебесінің өзгергенін растады, деп хабарлады MadeniPortal.kz.

ҚР ІІМ вице-министрі Санжар Әділов 2026 жылғы 25 қаңтарда журналистерге Гулайым Рахмонованың қылмыстық іс бойынша күдікті деп танылғанын айтты.

“Қазіргі уақытта қорғау тарапы тергеу материалдарымен танысу процесі жүріп жатыр”, – деп түсіндірді ол.
Бұған дейін әйел іс бойынша қорғауға құқығы бар куә мәртебесінде болған, алайда дәлелдер жиналуына қарай тергеу оның процессуалдық мәртебесін өзгерту туралы шешім қабылдаған.

Қылмыстық іс ҚР Қылмыстық кодексінің 245-бабы 4-бөлігі бойынша тергеліп жатыр – жол қозғалысы ережелерін бұзу салдарынан абайсызда екі немесе одан да көп адамның қаза табуы. Кінәсі дәлелденген жағдайда, аталған баптың санкциясы бес жылдан он жылға дейін бас бостандығынан айыруды, сондай-ақ жеті жылға дейін көлік құралын басқару құқығынан айыру түріндегі қосымша жазаны қарастырады.

Тергеу органдары сотқа дейінгі тергеп-тексеруді жалғастыруда. Жауапкершілік дәрежесіне қатысты түпкілікті қорытынды сот қарауының нәтижесі бойынша шығарылады.