«Ауруханада МРТ да дәрі де болмады»: науқастың өлімінен кейін туыстары дабыл қақты

Ақмола облысындағы Көпбейінді облыстық №2 ауруханада ем қабылдаған ер адам қайтыс болды. Марқұмның туысы Арай Нарбутина әлеуметтік желі арқылы Денсаулық сақтау министрлігіне үндеу жасап, медициналық көмектің сапасы мен аурухана жұмысын жан-жақты тексеруді сұрады, деп хабарлады MadeniPortal.kz.

Арай Нарбутина жазбасында ағасы Кенжин Е.Б.-ның 22 тамызда ауруханада көз жұмғанын мәлімдеді. Оның айтуынша, ер адамның денсаулығы 15 тамыздан 16 тамызға қараған түні нашарлаған. Туыстары жедел жәрдем шақырғанымен, сол кезде ауруханаға жатқызуға көрсетілім жоқ екені айтылған. Келесі күні жақындары оны өздері Астанаға жеткізіп, Көпбейінді облыстық №2 ауруханаға апарған. Алдын ала «пневмония» диагнозымен бөлімшеге жатқызылған.

Туысының сөзінше, 17 тамыздан 18 тамызға қараған түні науқастың жағдайы күрт нашарлап, демігіп, құрысу белгілері байқалған. Кейін дәрігерлер инсульт алдындағы жағдай болуы мүмкін деп МРТ тағайындаған. Алайда автордың мәлімдеуінше, ауруханада МРТ болмағандықтан, туыстары ақылы жедел жәрдем тауып, науқасты тексеруге өз қаражаттарына жеткізуге мәжбүр болған.

Оның айтуынша, МРТ-дан кейін науқастың жағдайы тағы нашарлап, құрысу мен тыныс алудың кідіруі байқалған. Кейін ол жансақтау бөліміне ауыстырылып, өкпені жасанды желдету аппаратына қосылған. Люмбальды пункциядан кейін дәрігерлер менингоэнцефалит диагнозын қойғаны айтылған.

Арай Нарбутина туыстары ем кезінде ацикловир мен физиологиялық ерітінді секілді бірқатар дәріні өздері сатып алғанын, қосымша зерттеулерді де өз қаражаттарына ұйымдастырғанын мәлімдеді. 22 тамызда науқас қайтыс болған.

Осыған байланысты отбасы Денсаулық сақтау министрлігінен медициналық көмектің уақтылы көрсетілген-көрсетілмегенін, диагноз бен емдеу шараларының клиникалық хаттамаларға сәйкестігін, сондай-ақ аурухананың дәрі-дәрмекпен қамтамасыз етілуі мен қаржыландырылуын тексеруді сұрады.

Әзірге аурухана мен Денсаулық сақтау министрлігінің бұл үндеуге қатысты ресми ұстанымы берілген жоқ. Жазбада келтірілген жайттар марқұмның туысының мәлімдемесіне негізделген және құзырлы органдардың тексеруін қажет етеді.

 

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от Arai Narbutina🤍 (@arainarbutina)