20 жастағы студент екі аяғынан айырылды: әкімнің ұлы рақымшылыққа ілікті

Астана – Павлодар тасжолында болған ауыр жол апатынан кейін екі аяғынан айырылған 20 жастағы студенттің ісіне қатысты жаңа дерек шықты. Көлік тізгінінде болған Арыс қаласы әкімінің ұлына қатысты қылмыстық іс рақымшылық актісі негізінде тоқтатылған, деп хабарлайды  MadeniPortal.kz.

Жол апаты 2026 жылғы 29 мамырда болған. Оқу сессиясын аяқтаған Талғат Павлодардағы үйіне Hyundai Tucson көлігімен қайтып бара жатқан.

Жолда көлік металл қоршауға соғылған. Соққы салдарынан қоршау көлік салонын тесіп өтіп, негізгі соққы артқы орындықта отырған студентке тиген. Талғат ауыр жарақат алып, дәрігерлер оның екі аяғын да ампутациялауға мәжбүр болған.

Басылым мәліметінше, көлік тізгінінде 22 жастағы Ердәулет Закиров – Арыс қаласының әкімі Қайсар Маңқараевтың ұлы болған.

Зардап шеккен жігіттің туыстары жүргізушінің бұған дейін жол ережесін бірнеше рет бұзғанын айтып, тергеудің әділ өтуіне алаңдаушылық білдірген. SHYNDYK.KZ дерегінде оның соңғы бір жыл ішінде жол қозғалысы ережесін бұзғаны үшін 29 рет жауапкершілікке тартылғаны жазылған.

Енді Павлодар облысының полиция департаменті аталған қылмыстық істің тоқтатылғанын ресми түрде растаған.

Полиция зардап шеккен тарапқа өз талаптарын азаматтық сот ісін жүргізу тәртібімен қарату үшін сотқа жүгіну ұсынылғанын да мәлімдеді.

Қазір Талғат үйінде. Алайда оның алдында тағы бір күрделі операция мен ұзақ оңалту кезеңі тұр.

Бұған дейін Арыс қаласының әкімі Қайсар Маңқараев ұлына қатысты тергеуге қызметтік жағдайын пайдаланып ықпал етпейтінін мәлімдеген. Әкімнің тергеу барысына араласқаны туралы расталған ақпарат жоқ.