Жамбылда 2,5 жастағы баланың асқазанынан 12 сантиметрлік түзіліс табылды (ВИДЕО)

Жамбыл облысында дәрігерлер 2,5 жастағы балаға күрделі операция жасап, асқазанынан сирек кездесетін ірі түзілісті алып тастады, деп хабарлайды MadeniPortal.kz. 

Жамбыл облыстық көпбейінді балалар ауруханасының мәліметінше, медициналық тексеру кезінде баланың асқазанынан безоар анықталған.

Безоар – асқазанда қорытылуы қиын немесе мүлде қорытылмайтын заттардың жиналуынан пайда болатын тығыз түзіліс. Балаларда мұндай жағдай өсімдік талшықтарын, дәндер мен қабықтарды, сондай-ақ шаш немесе жіп секілді бөгде заттарды жұту салдарынан туындауы мүмкін.

Операция барысында хирургтер баланың асқазанынан ұзындығы шамамен 10–12 сантиметр, ені 7–9 сантиметр болатын безоарды толық алып тастаған.

Күрделі хирургиялық операцияны дәрігерлер Эльбрус Салпагаров пен Алимжан Аукенов жасаған. (ВИДЕО)

Мамандардың айтуынша, дер кезінде жүргізілген диагностика мен хирургиялық көмек асқынудың алдын алып, баланы уақытылы емдеуге мүмкіндік берген.

Қазір баланың жағдайы жақсы. Операциядан кейін ол қажетті медициналық бақылаудан өтіп, емдеу курсын толық аяқтаған. Кейін ауруханадан үйіне шығарылды.

Дәрігерлер ата-аналарға балалардың ұсақ заттарды аузына салмауын қадағалауды ескертеді. Егер балада іштің ауыруы, тәбеттің төмендеуі немесе құсу белгілері байқалса, дереу медициналық көмекке жүгіну қажет.

 

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от @densaulyk.zhambyl