Шәмші Қалдаяқовтың туғанына 96 жыл

Бүгін қазақтың біртуар композиторы, «қазақ вальсінің королі» атанған Шәмші Қалдаяқовтың туғанына 96 жыл толып отыр, деп хабарлайды MadeniPortal.kz.

Шәмші әндері – ұрпақтан ұрпаққа жалғасып келе жатқан асыл мұра. «Менің Қазақстаным», «Арыс жағасында», «Ақ бантик» және басқа да көптеген туындылары бірнеше буынның қуанышы мен мұңын, махаббаты мен үмітін әуенмен өрнектеген өлмес шығармаларға айналды. 

Композитордың әуендерінен қазақ даласының кең тынысы, ұлттық болмыс пен жүрекке жақын ерекше сыршылдық сезіледі. Оның әндері қарапайым әрі әсерлі әуенімен миллиондаған тыңдарманның жүрегінен орын тапты. 

Шәмші Қалдаяқов қазақ ән өнерінің дамуына зор үлес қосып, ұлттық эстраданың қалыптасуына өзіндік қолтаңбасын қалдырды. Оның шығармаларында туған жерге деген сүйіспеншілік, анаға деген құрмет, жастықтың жалынды сезімі мен махаббаттың нәзік сырлары кеңінен көрініс тапты. 

Сазгердің «Менің Қазақстаным» әні бүгінде еліміздің Мемлекеттік Әнұранына айналып, халықтың елге деген сүйіспеншілігі мен патриоттық рухының символына айналды. 

Шәмші Қалдаяқовтың туғанына 96 жыл толса да, оның әуезді әндері уақыт көшіне ілесіп, өз маңызын жоғалтқан жоқ. Керісінше, жыл өткен сайын композитор мұрасының қадірі артып, әндері жаңа буынның орындауында қайта жаңғырып келеді. 

Шәмші – қазақтың жүрегін әнге бөлеген, ұлттық музыканың биігіне көтерілген дара тұлға. Оның есімі де, әсем әндері де халқымызбен бірге мәңгі жасай береді.