20 жыл бойы мұздатқышта жатқан: Жаңа туған сәбидің денесі табылды

Испанияның Оренсе провинциясындағы Альярис муниципалитетінде адам шошырлық жағдай анықталды. Тұрғын үйдің гаражында тұрған мұздатқыштан жаңа туған нәрестенің денесі табылған. Алдын ала мәлімет бойынша, сәби 20 жылдан астам уақыт бұрын көз жұмған болуы мүмкін, деп хабарлайды MadeniPortal.kz. 

Испаниялық La Región басылымының мәліметінше, сәбидің денесін анасы қайтыс болғаннан кейін оның заттарын жинастырып жүрген әйел тауып алған.

Әйел бұрынғы үйдің бөлмелерін тексеріп жүріп, бірінші қабаттағы гараждың қосалқы бөлмесінде тұрған мұздатқышты ашқан. Оның ішінен нәрестенің денесін көрген ол дереу құқық қорғау органдарына хабар берген.

Алдын ала зерттеу нәтижесінде нәрестенің ана құрсағында 32–34 апта дамығаны анықталған. Сондай-ақ мамандар сәбидің дүниеге келгеннен кейін тыныс алған болуы мүмкін екенін мәлімдеді. Алайда оның нақты неден көз жұмғаны әзірге белгісіз.

Қазір тергеушілер оқиғаның мән-жайын анықтап жатыр. Осы мақсатта отбасының айналасындағы бірнеше адамнан жауап алынған. Ал нәрестенің биологиялық ата-анасын анықтау үшін ДНҚ үлгілері Мадридтегі зертханаға жіберілді.

Тергеушілер сәби басқа жерде көз жұмған болуы мүмкін деген нұсқаны да қарастырып жатыр. Болжам бойынша, мұздатқыш Оренседен Альяриске кейінірек жеткізілген болуы ықтимал.

Қылмыстық іс материалдары Оренсе сотына жолданған. Енді мамандар нәрестенің тірі туған-тумағанын, сондай-ақ оның өлімі қасақана әрекеттен немесе босанғаннан кейін қажетті күтім көрсетілмеуінен болған-болмағанын анықтауы тиіс.

Сонымен қатар тергеу барысында тағы бір маңызды мәселе туындаған. Егер нәресте шынымен 2000 жылдардың басында көз жұмған болса, ықтимал қылмыс бойынша жауапқа тарту мерзімі өтіп кеткен болуы мүмкін. Испания заңнамасында адам өміріне қарсы кейбір қылмыстар үшін ескіру мерзімі 20 жылды құрайды.

Әзірге сәбидің кім екені және оның өліміне не себеп болғаны анықталған жоқ. Тергеу жалғасып жатыр.