Әлемдік танымал бренд Dior-дың басшысы жол апатынан көз жұмды

Францияның батысында болған жол апатынан танымал кинопродюсер Николя Альтмайер мен оның жұбайы, Dior сән үйінің қоғаммен байланыс бөлімінің жетекшісі Матильда Фавье көз жұмды, деп хабарлайды MadeniPortal.kz.

Қайғылы оқиға 17 тамызда Де-Севр департаментіндегі Эрво қаласының маңында болған. Ерлі-зайыпты отырған көлік басқа автомобильді басып озу кезінде қарсы бағытта келе жатқан жүк көлігімен соқтығысқан. Николя Альтмайер 61 жаста, ал Матильда Фавье 57 жаста болған.

Николя Альтмайер туған бауыры Эрикпен бірге Mandarin & Compagnie продюсерлік компаниясын басқарған. Ағайындылар француз киносының танымал жобаларына атсалысып, «OSS 117», «Brice de Nice» және Францияның бұрынғы президенті Николя Саркозидің саяси мансабына арналған «Conquest» фильмдерін түсірген.

2017 жылы Альтмайерлер Франциядағы жылдың үздік продюсерлеріне берілетін Даниэль Тоскан дю Плантье сыйлығын иеленген. Николя Альтмайер соңғы жылдары француз киносының белгілі продюсерлерінің бірі ретінде танылды.

Ал Матильда Фавье сән индустриясындағы ықпалды мамандардың бірі болған. Ол Dior сән үйінің қоғаммен байланыс бағытын он жылдан астам уақыт бойы басқарды. Бұған дейін Chanel, Glamour және Prada компанияларында жұмыс істеген.

Фавье Dior-дың әлемге танымал тұлғалармен және бренд елшілерімен байланысын дамытуға елеулі үлес қосты. Ол сән әлеміндегі беделді шараларда жиі көрініп, Париждің сән және мәдени өміріндегі танымал тұлғалардың біріне айналған.

Ерлі-зайыптылардың қазасынан кейін кино, сән және саясат саласының өкілдері көңіл айтты. «OSS 117» фильмінде басты рөлді сомдаған актер Жан Дюжарден бұл жағдайды «орасан қайғы әрі ауыр соққы» деп атады.

Dior басшылығы да Матильда Фавьенің қазасына байланысты көңіл айтып, оның сән үйінің дамуына қосқан үлесін атап өтті. Компания өкілдері оны кәсібилігі, адалдығы және ерекше энергиясы үшін еске алды.