Әуежайдың тас-талқаны шықты: Бразилиядағы жойқын торнадоның салдары белгілі болды

Бразилияның оңтүстігіндегі Шапеко қаласында жойқын торнадо соғып, тұрғын үйлер мен инфрақұрылым нысандарына айтарлықтай зиян келтірді. Табиғи апат салдарынан әуежай жұмысын тоқтатты, деп хабарлайды  MadeniPortal.kz Бразилияның ресми органдарына сілтеме жасап.

Табиғи апат 4 қарашада Санта-Катарина штатындағы Шапеко қаласында болған. Бразилияның Ұлттық метеорология институты жел екпіні сағатына 126 шақырымнан асқанын тіркеді.

Қатты жел тұрғын үйлердің шатырын жұлып, ағаштарды құлатқан. Кейбір аудандарда электр энергиясы мен байланыс жүйесінің жұмысы бұзылған.

Торнадодан қаланың Серафим Эносс Бертасо әуежайы да зардап шекті. Ғимараттың терезелері сынып, металл құрылымдары мен шатырының бір бөлігі зақымданған. Әуежайда ұшақтардың ұшуы мен қонуы уақытша тоқтатылды.

Әуежайды басқаратын Voe Xap компаниясының мәліметінше, мамандар бүлінген нысандарды қалпына келтіріп жатыр. 5 қарашадағы жағдай бойынша әуежайдың нақты қашан ашылатыны белгісіз болған.

Санта-Катарина штатының Азаматтық қорғаныс қызметі Шапеко қаласынан бөлек, Ксансере қаласында да торнадо тіркелгенін растады. Өңірде дауыл мен нөсерден ондаған елді мекен зардап шеккен.

Жергілікті билік табиғи апаттан келген шығын көлемін анықтап, тұрғындарға көмек көрсету жұмыстарын жалғастырып жатыр.