«Медальдары мен жүлделерінен айырылды»: Қазақстандық спортшы допинг қолданғанын мойындады

Қазақстандық спортшы Зейнеп Оразхан допингке қарсы ережелерді екі рет бұзғаны үшін үш жылға жарыстардан шеттетілді. Оның ағзасынан тыйым салынған мельдоний препараты анықталған, деп хабарлайды MadeniPortal.kz.

Бұл туралы Халықаралық тестілеу агенттігі (ITA) Жаһандық аралас жекпе-жек қауымдастығының (GAMMA) атынан ресми мәлімдеме жасады.

Агенттік мәліметінше, спортшыдан допинг сынамасы 2024 жылғы 14 желтоқсанда Индонезияның Тангеранг қаласында өткен GAMMA әлем чемпионаты кезінде алынған. Зертханалық сараптама нәтижесінде оның ағзасынан мельдоний препараты табылған.

Мельдоний Дүниежүзілік допингке қарсы агенттіктің (WADA) тыйым салынған заттар тізіміне енгізілген. Оны жарыс кезінде де, жарыстан тыс уақытта да қолдануға болмайды. ITA мәліметінше, аталған препарат спортшының төзімділігін арттырып, физикалық жүктемеден кейін қалпына келу уақытын қысқартуы мүмкін.

Допинг анықталғаннан кейін Зейнеп Оразхан жарыстардан уақытша шеттетілген. Алайда спортшы уақытша шеттету талаптарын сақтамағандықтан, бұл кезең негізгі дисквалификация мерзіміне есептелмейді.

Екінші заңбұзушылық спортшының тыйым салынған медициналық әдісті қолдануымен байланысты. Атап айтқанда, ол 12 сағат ішінде жалпы көлемі 100 миллилитрден асатын инфузия алғанын мойындаған. Мұндай әдіске WADA ережелері бойынша, арнайы медициналық ерекшеліктерді қоспағанда, тыйым салынған.

Зейнеп Оразхан екі заңбұзушылықты да мойындап, ITA ұсынған санкциялармен келіскен. Ережені бұзғанын ерте мойындағаны үшін оның дисквалификация мерзімі бір жылға қысқартылып, түпкілікті үш жыл болып белгіленді.

Осылайша, қазақстандық спортшы 2029 жылғы 19 қазанға дейін жарыстарға қатыса алмайды.

Сонымен қатар оның 2024 жылғы GAMMA әлем чемпионатындағы нәтижелері жойылады. Спортшы сол жарыста алған медальдарынан, рейтингтік ұпайлары мен жүлделерінен айырылады.

Бұдан бөлек, 2024 жылғы 14 желтоқсаннан бастап тіркелген барлық жеке спорттық нәтижелері де жарамсыз деп танылады.