«Пруст сауалнамасының» қонағы – ақын Төреғали Тәшенов

– Адамның басты қасиеті не деп ойлайсыз?

– Адам боп қалу.

– Ер-азаматтың басты қасиеті ше?

– Өз биігінен төмендемеу.

– Бақыт деген ұғымды қалай түсінесіз?

 – «Сират көпірінен өтпейінше, Хақ дидарын көрмейінше, бақыттымын дегенің бекер» дейді ғұламалар. Үлкен ұғымдағы, нағыз Бақыт дегенің сол! Ал былайынша, бақыт деген – жақсылыққа Жаратқанның мүмкіндік беріп тұруы.

– Сүйікті әдеби кейіпкеріңіз кім?

– Ондай бір кейіпкерге байланып көрмеппін.

– Ең басты кемшілігіңіз қандай?

– Жарқылдап не қарқылдап күле алмау.

– Бос уақытыңызда немен

айналысасыз?

– Тауға қарап отыра бергім келеді.

 – Өмірге екінші рет келсеңіз, кім болуды қалар едіңіз?

– Өмірге екінші рет келгеніңді өзің білмейтін болған соң, одан не пайда?

– Қандай елде өмір сүргіңіз келеді?

– Өз елімде. Өз елімнен қуылсам, түркі елдерінде. Ол жақтан да қуылсам, мұсылман елдерінде.

– Қандай ерекше қабілетке ие болғыңыз келеді?

– Тылсым дүниенің сырына бойлай білетін қабілетке ие болғым келеді.

 – Қандай сәттерде осалдық танытасыз?

– Бір қатты көңілім қалған адамды кешіруге келгенде.
 – «Ғайыпқа сену» дегенді қалай түсінесіз?

 – Ғайыпқа сенуді Құдайға сену деп түсінемін.

– Егер өнертапқыш болсаңыз, не нәрсені ойлап табар едіңіз?

– Дәл қазір бір жастағы немеремнің ой-санасына лайықталған құрылғы ойлап табар едім.

– Неден жиіркенесіз?

– Оқыған наданнан жиіркенемін.

– Сіз үшін ең ұнамсыз тарихи тұлға кім?

– Голощекин.

– Жиі айтатын қанатты сөзіңіз?

– «Аққа Құдай жақ».

– Көзіңізге жиі жас аласыз ба?

– Жиі деп айтсам да болады.

– Үнемі есіңізде жүретін Абайдың бір сөзі?

 – «Сенбе жұртқа, тұрса да қанша мақтап»

 – Қазіргі адамдардың бойынан қандай қасиеттер жоғалып барады?

– Аңқаулық. Сенгіштік.

– Біздің заманымыздың мықты ақыны кім? Мықты жазушысы ше?

– Біреуге алабөтен ерекшелеп баға беруді, әсіресе тізімді жек көремін.

– Жас қаламгерлердің бойынан қандай артықшылықтар мен кемшіліктерді көріп жүрсіз?

– Артықшылықтары – өздерін де, сөздерін де жақсы жарнамалай алатындықтары, кемшіліктері де сол.