Іс - шара балалар жазушысы, баспагер, Қазақстан Жазушылар одағының мүшесі, «Дарабоз» халықаралық сыйлығының лауреаты «Molia & DOS» баспахана кешенінің директоры, республикалық «Абитуриент», «Турист» газеттерінің бас редакторы Баян Болатхановaның «Менің жасыл әлемім» әңгімесін негізге ала отырып, қаламгердің шығармашылығына арналған оқырман мен жазушы арасындағы кездесу форматында ұйымдастырылды. 

Әдеби кешке белгілі ақын, Халықаралық «Алаш» әдеби сыйлығының иегері Аян Нысаналин, Әл-Фараби атындағы Қазақ ұлттық университетінің Журналистика факультетінің Баспагерлік – редакторлық және дизайнерлік өнер кафедрасының меңгерушісі, экономика ғылымының кандидаты, профессор Жетпісбай Бекболатұлы, Әдебиет зерттеушісі, журналист, «Рух» баспасының директоры, белгілі баспагер Хабдина Балжан, Қазақстан Республикасының еңбек сіңірген əртісі, «Құрмет» орденінің иегері Сұлушаш Нұрмағамбетова, Талғар қалалық балалар музыка мектебінің вокал пәнінің мұғалімі Забира Атантаева және кітапхананың тұрақты оқырмандары, мектептердің оқушылары, кітапханашылары, ата-аналар қатысты. 

Қазақтың көрнекті ақыны, сыншы Аян Нысаналин қаламгер қарындасы Баян Болатханованың ең алғашқы еңбек жолын, республикалық «Лениншіл жас» газетінде бірге қызмет атқарған жылдары туралы естелігін әңгімелеп берді. Үзеңгілес замандастары, белгілі баспагер Хабдина Балжан мен жас журналистерге тәлім-тәрбие беріп жүрген ұстаз-ғалым Жетпісбай Бекболатұлы, Баян Болатханованың шығармашылығына жан-жақты тоқталып баға берді. 

Кеш барысында балалар күй тартып, мерекеге арналған тақпақтарын оқыды. Кеш соңында шараға белсене қатысқан оқырмандарға автор-жазушының қолтаңбасы қойылған «Қарагөз-ғұмыр» атты кітаптары сыйға беріліп, Орталықтандырылған кітапхана жүйесінің директоры Қабиева Розаның атынан мақтау қағаздары тапсырылды. 

Ал жас оқырмандарға жазушы Баян Болатханова: «Қазақ тілінің, әдебиетінің болашағы өздеріндей зерек, кітапты сүйіп оқитын балалардың қолында деп ойлаймын» деп сенім білдірді.

madeniportal.kz