Мақсаты – Ұлттық домбыра күні аясында Атырау облысы тарихи-өлкетану музейінің қорында жинақталған домбыралар коллекциясы мен өнер иелерінің жеке тұтынған бұйымдары және өлкенің мәдени жетістіктерін дәлелдейтін ғасырлар бойы әр қазақтың төрінен орын алған қастерлі қара домбыраның мәртебесін жаңғырту, домбыра иелері, өнер өкілдерінің өмір жолдары мен сыршыл пернелерге тіл бітірген қолөнер шеберлерінің домбыраларын насихаттау.   

ҚР Ұлттық музейінің директоры Арыстанбек Мұхамедиұлы көрменің ашылу салтанатында халқымыздың қазынасы ұлттық домбыраны насихаттау, рухани құндылықтарымызға негіз болуымыз маңызды іс екенін атап өтті. 

Шара аясында Арыстанбек Мұхамедиұлы «Қорқыт» этноансамблінің солистері Әлішер Есенжулов және Бекзат Прилепесовпен қосыла, Құрманғазының «Балбырауын» күйін тарту етті. 

Өз кезегінде Атырау облысы әкімінің орынбасары Нариман Таушов «Құрманғазы» поэмасын алғаш жырлаған Х.Ерғалиевтың ерекше домбырасының көшірмесін  ҚР Ұлттық музейіне сыйға тартты. 

ҚР Мәдениет және спорт вице-министрі Нұрғиса Дәуешов «Ұлттық домбыра күні» мерекесі халқымыздың тарихы мен болашағына, жалпы ұлттық болмысымызға маңызы зор, әрі мәртебелі екенін айта кетті. 

Өз кезегінде сөз алған ҚР мәдениет қайраткері, Атырау облысының құрметті азаматы Орақ Жауыров экспозицияны ұйымдастырушыларға ризашылығын білдіре отырып, өзінің 50 жылға жуық қолданған қасиетті қара домбырасын зор ықыласпен Атырау облыстық тарихи-өлкетану музейіне табыстады.  

Атап өтсек, экспозицияға жалпы саны 244 жәдігер қойылды. Оның ішінде музей қорына 1975 жылы қабылданған күміспен және сүйекпен әшекейленген Батыс Қазақстандық үлгіде жасалған домбыра, Қазақ КСР-ның халық әртісі Дина Нұрпейісованың, батыр, дауылпаз ақын Махамбет Өтемісұлының (көшірме), ақын Абай Құнанбайұлының (көшірме), КСРО-ның халық әртісі Нұрғиса Тілендиевтің, Қазақстанның халық әртістері Қаршыға Ахмедияровтың, Рыспай Ғабдиевтің, Әзидолла Есқалиевтің, Қазақстанның еңбек сіңірген әртістері Мекес Төрешовтың және Айгүл Үлкенбаеваның домбыралары, жалпы саны 40 жеке тұлғаның қос ішекті қоңыр үнді саз аспаптары, сондай-ақ сыршыл пернелерге тіл бітірген домбыра жасаушы қолөнер шеберлері Бисенғали Мырзағалиевтің бас альт-тенор домбырасы және Нұрсұлтан Қалиевтің ұлттық аспаптары қойылды.        

Еске сала кетейік, аталған көрмені өнерсүйер қауым Қазақстан Республикасының Ұлттық музейінде 30 шілдеге дейін тамашалай алады.

madeniportal.kz